Añada pa un güeyu muertu ye una novela n'asturianu cola que ganó en 1985 Adolfo Camilo Díaz el Premiu Xosefa Xovellanos. Trátase d'un thriller crepuscular que diba marcar a toa una xeneración de narradores asturianos. La novela, editada daquella pol Gobiernu asturianu, tuvo un interesante percorríu de crítica y públicu, y convirtió al so autor (que volvería ganar el mesmu premiu n'otres tres ocasiones) nún referente ineludible de la lliteratura asturiana contemporánea. Trátase d'una novela inaugurar pa la lliteratura n'asturianu: ye la primer novela de Ciencia ficción y la primera -y tovía güei una de les poques- con una lesbiana como protagonista. La llingua asturiana certificaba, asina, que yera apta pa representar cualaquier trama o sentimientu. La influyencia d'Añada pa un güeyu muertu, una novela que fizo que la lliteratura n'asturianu entrara na Segunda Xeneración del Surdimientu, foi reconocida col pasu de los años como una novela de cultu de les lletres asturianes.
Argumentu La familia del inxenieru xefe d'una central nuclear entretien los ocios nocherniegos viendo la televisión cuando un escape na central nuclear -opción posible que nun se confirma na novela- «solidifica» los personaxes catódicos, que s'escapen de les 625 llinies y empiecen a matar.
Segunda edición Suburbia Ediciones rellanza esta novela inaugural nel 2011 con una edición onde'l propiu autor revisó'l testu pa espurgalu d'hiperasturianismos y espresiones usaes na llingua lliteraria d'aquel periodu pero estrañes pal llector actual. La edición complétase con un epílogu desplicativu del autor y un prólogu de Xandru Fernández.
Referencies
Enllaces esternos
Categoría:Noveles n'asturianu Categoría:Noveles ganadores del Premiu Xosefa Xovellanos