Les Normes ortográfiques del asturianu ye la codificación normativizadora primera y básica del asturianu afitada pola máxima institución llingüística asturiana: l'Academia de la Llingua Asturiana. Foi'l primer llabor normativu que fizo l'Academia, presentando unes primeres normes ortográfiques el 22 de xineru de 1981, Lletres Asturianes 1, páxina 61. Academia de la Llingua Asturiana, Uviéu, mayu de 1981. siendo la primer obra asoleyada de toles sos publicaciones.

Historia y desendolcu Enantes d'esti primer llabor normativu, l'asturianu contaba dende los años setenta del sieglu XX con dos posibles "normes", les de Conceyu Bable o les del Conceyu d'Asturies de Madrid.Ramón d'Andrés, Cuestiones d'asturianu normativu. Volume II; páx. 51 y ss. Publicaciones Ámbitu, Uviéu, 2002. ISBN 84-95640-28-7. Cola creación de l'Academia, publícase en 1981 una primera ortografía institucionalizada, sol nome de Normes ortográfiques y entamos de normalización, que van ser l'entamu de la norma estándar actual pal asturianu. D'esta primer edición llama l'atención el desaniciu dafechu de los denomaos «grupos consonánticos cultos» de manera xeneral (dicionariu, lletura, istante, oservación en cuentes de les formes actuales diccionariu, llectura, instante, observación), y la representación escrita de la pérdiga de la «-r» final del infinitivu enantes del artículu («...propónse l'Academia amestá los estremaos criterios...»); y sobre manera, la primer apaición na escritura asturiana de los dígrafos ⟨ḷḷ⟩ y ⟨ḥ⟩.

En marzu de 1985 publícase la segunda edición de les Normes ortográfiques y entamos normativos,Lletres Asturianes 15. Apéndiz. Academia de la Llingua Asturiana, Uviéu, mayu de 1985. y dos años depués el primer «anexu», Amestadures I (1987), y al añu siguiente'l segundu d'ellos, lAmestadures II (1988), que desarrollen les regles básiques presentaes nes dos primeres ediciones. En 1989 asoléyase la tercer edición, sol mesmu títulu, onde tán yá recoyíes esos anovamientos, ente los que destaca la recuperación na escritura de los grupos consonánticos cultos y, na reimpresión de 1990, el desaniciu de l'apostrofación ⟨'n⟩ de la preposición en.Normes ortográfiques y principios normativos; 3ª edición correxida. Academia de la Llingua Asturiana, Uviéu, 1990. ISBN 84-86936-13-6.

Nel añu 1989 publica tamién l'Academia'l so «diccionariu» verbal Conxugación de verbos asturianos,Conxugación de verbos asturianos. Academia de la Llingua Asturiana, Uviéu, 1989. ISBN 84-86936-08-X. que s'axuntará coles Normes nun únicu volume dende la cuarta edición de 1993, sol nome de Normes ortográfiques y conxugación de verbos y que va ser el formatu definitivu dende entóncenes pa les Normes.Normes ortográfiques y conxugación de verbos; 4ª edición revisada. Academia de la Llingua Asturiana, Uviéu, 1993. ISBN 84-86936-95-0.

Cola publicación en 1998 de la Gramática de la Llingua Asturiana, van surdir dalgunes novedaes y ameyoramientos na normativa ortográfica, que van tar recoyíos depués tamién na quinta edición, agora col nome cenciellu de Normes ortográfiques; destaquen l'apaición de los dígrafos ⟨ts⟩ y ⟨yy⟩, y l'enderechamientu de la ortografía con «-o» final nos alverbios y numberales, amás d'enantar l'apartáu sobro los grupos consonánticos.Normes ortográfiques; 5ª edición. Academia de la Llingua Asturiana, Uviéu, 2000. ISBN 84-8168-211-X. Publícase a finales del añu 2000, depués del asoleyamientu del DALLA. Va tener dos ediciones posteriores, la sesta en 2005,Normes ortográfiques; 6ª edición revisada. Academia de la Llingua Asturiana, Uviéu, 2005. ISBN 84-8168-394-9. y la séptima en 2012,Normes ortográfiques; 7ª edición revisada. Academia de la Llingua Asturiana, Uviéu, 2012. ISBN 978-84-8168-532-9. que nun van ser otra cosa qu'una reimpresión ensin nengún cambéu bultable na normativa ortográfica.

En 2021 edítase la octava edición, cola novedá d'incluyir y utilizar l'Alfabetu Fonéticu Internacional pa trescribir los soníos del asturianu (hasta la versión anterior, usábense solo los signos fonéticos de la Revista de Filología Española''), y la igualación de les grafíes «l.l» y «h.» a «ḷḷ» y «ḥ'''», dexando de ser una simple solución gráfica por dificultá tipográfica n'escribiles.Normes ortográfiques; 8ª edición revisada. Academia de la Llingua Asturiana, Uviéu, 2021. ISBN 978-84-8168-572-5.

Ver tamién Gramática del asturianu Diccionariu de la Llingua Asturiana

Referencies

Enllaces esternos Normes ortográfiques, Academia de la Llingua Asturiana (8ª edición, Uviéu, 2021).

Categoría:Idioma asturianu Categoría:Academia de la Llingua Asturiana