L'acantisita verdosu (Acanthisitta chloris) ye una especie d'ave de la familia Acanthisittidae y única representante del xéneru Acanthisitta. Ye una especie endémica de Nueva Zelanda. N'inglés llámase-y "Rifleman" y en maorí "Tītipounamu".
Descripción Ye una ave bien pequeña, la más pequeña de Nueva Zelanda, con unos 8 cm, y que pesa ente 6 y 7 gramos. El machu ye d'un color mariellu verdosu penriba, col obispillo verde, lladrales mariellos y les partes inferiores blanques. Na cabeza amuesa una ceya blanca. La fema estremaser en que'l so envés ye de color marrón claro con un rayáu escuru, y un obispillo marrón amarellentáu. Los xuveniles son paecíos a les femes, pero col pechu llistáu.
Distribución y hábitat Ye una ave endémica de Nueva Zelanda, onde se distribúi poles dos grandes islles, según por delles de les menores.
Habita en zones forestales (sobre manera en montes vieyos) y tamién n'árees de carba.
Comportamientu Ye una especie sedentaria, que defende un territoriu permanente, y que se suel empareyar pa tola vida. La llegada de los europeos, supunxo la perda d'una bona parte y el so hábitat, y el so cayente; y anque sigue siendo una especie bien común, la so distribución ta bien estazada.
Aliméntase sobre manera d'invertebraos y n'ocasiones de pequeños frutos. Busca la so comida nes cañes y tueros de los árboles, baxando pocu al suelu.
Subespecies Tien descrites dos subespecies: A. c. chloris (Sparrman, 1787) - Islla Sur, islla Stewart y islla Codfish. A. c. granti Mathews & Iredale, 1913 - Islla Norte, islla Gran Barrera y islla Pequeña Barrera.
Referencies
Enllaces esternos
Categoría:Acanthisittidae Categoría:Xéneros monotípicos d'aves Categoría:Animales descritos en 1787