Gamma Crateris (γ Crt / 15 Crateris / HD 99211)Gamma Crateris (SIMBAD) ye una estrella na constelación de Crater. Con magnitú aparente +4,08, ye la tercera más brillosa de la mesma dempués de δ Crateris, y práuticamente igual en rellumu a Alkes (α Crateris). Alcuéntrase a 82 años lluz de distancia del Sistema Solar.
Gamma Crateris ye una estrella blanca de la secuencia principal de tipu espectral A7V —tamién clasificada como A5V—Gamma Crateris (The Bright Star Catalogue) con una temperatura superficial averada de 9000 K. Ye por tanto similar a Altair (α Aquilae), α Circini o λ Piscium, siendo la so lluminosidá 12 vegaes mayor que la del Sol. El so radiu ye un 50% más grande que'l radiu solar y xira sobre sigo mesma con una velocidá de rotación proyeutada de 138 km/s, lo que da llugar a un periodu de rotación inferior a 14,4 hores.Gamma Crateris (Stars, Jim Kaler) Con una masa de 1,75-1,9 mases solares, tien una edá averada de 600 o 700 millones d'años. Amuesa un escesu nel infrarroxu a 70 μm que s'atribúi a la presencia d'un discu de polvu arrodiando a la estrella, probablemente similar al de Vega (α Lyrae).
Gamma Crateris ye una estrella binaria, siendo la separación visual ente dambes componentes de pocu más de 5 segundos d'arcu. La estrella acompañante, de magnitú visual +7,9, alcuéntrase a una distancia de 136 UA de la estrella principal.
Referencies
Categoría:Estrelles Categoría:Estrelles blanques de la secuencia principal Categoría:Estrelles binaries Categoría:Constelación de Crater