Homam (ζ Pegasi / ζ Peg / 42 Pegasi) ye una estrella de magnitú aparente +3,40 en constelación de Pegasu. El so nome, escritu tamién como Homan o Humam, ye d'orixe árabe; esta estrella y ξ Pegasi yeren conocíes polos antiguos árabes como «les estrelles de la suerte del héroe».
Homam ye una estrella blancu-azulada de tipu B8V distante 209 años lluz del Sistema Solar. Con una temperatura superficial de 11.190 K, ye 227 vegaes más lluminosa que'l Sol. Tien un radiu 4 vegaes más grande que'l radiu solar y una masa entendida ente 3,3 y 3,5 mases solares, lo que concuerda más con una subxigante que con una estrella de la secuencia principal. La so edá envalórase en 260 millones d'años. Como otres estrelles B, tien una metalicidá inferior a la solar, aproximadamente'l 40% de la mesma. La so velocidá de rotación ye de siquier 140 km/s, dando llugar a un periodu de rotación igual o inferior a 1,4 díes. Ye una estrella variable pulsante lenta —asemeyada a 53 Persei— que'l so rellumu amuesa una pequeña oscilación de 0,00049 magnitúes nun periodu de 22,95 hores.
Piénsase que Homam forma un sistema binariu con una estrella de magnitú 11 visualmente a 177 segundos d'arcu. L'acompañante ye una nana naranxa de tipu K6 dixebrada siquier 11.000 UA de la estrella principal. Una tercer estrella a 61 segundos d'arcu de Homam paez nun tar físicamente rellacionada con ella.
Referencies
Homam (SIMBAD) Homam (Stars, Jim Kaler)
Categoría:Estrelles Categoría:Estrelles binaries Categoría:Estrelles variables Categoría:Constelación de Pegasu