Theta Draconis (θ Dra / 13 Draconis / HD 144284) ye una estrella de la constelación de Draco (el dragón) de magnitú aparente +4,01. Alcuéntrase a 68 años lluz del Sistema Solar.
Theta Draconis ye una subxigante de tipu espectral F8IV con una temperatura de 6290 K y una lluminosidá 8,6 vegaes mayor que la del Sol. El so radiu, calculáu a partir de la midida del so diámetru angular, ye 2,5 vegaes mayor que'l radiu solar y la so metalicidá ye'l 85% de la del Sol. La so velocidá de rotación nel ecuador ye estraordinariamente alta, de siquier 28 km/s —nun se conoz l'enclín de la so exa al respective de nós—, lo que resulta nun periodu de rotación inferior a 4,5 díes.
Theta Draconis ye una binaria espectroscópica colos sos dos componentes bien próximes ente sigo. El periodu orbital ye de namái 3,0708 díes; per aciu téuniques infrarroxes sábese que la órbita ye pocu escéntrica y que les mases de les estrelles son 1,21 y 0,46 vegaes la masa solar pa la componente principal y secundaria respeutivamente. Ésta última sería una nana colorada de tipu M2, orbitando a apenes 0,05 UA, equivalente a un 13% de la distancia ente Mercuriu y el Sol. L'alta velocidá de rotación reparada na estrella principal pue tar causada por efecto de marea que provocaron que la rotación sía síncrona; nesi casu'l periodu de rotación sería de 3,07 díes.
Referencies
Theta Draconis - Spectroscopic binary (SIMBAD) Theta Draconis (Stars, Jim Kaler)
Categoría:Estrelles Categoría:Subxigantes Categoría:Estrelles binaries Categoría:Constelación de Draco