Zeta Sculptoris (ζ Scl)Zeta Sculptoris -- Spectroscopic binary (SIMBAD) ye una estrella asitiada na constelación de Sculptor. Alcuéntrase mui cerca del coluro equinoccial, meridianu de la esfera celeste que pasa polos polos celestes y polos equinoccios. Ye, con magnitú aparente +5,02, la sesta estrella más brillosa na constelación.
Anque nes bases de datos Zeta Sculptoris figura catalogada como xigante azul de tipu espectral B4III, los sos parámetros físicos correspuenden a los d'una estrella inda na secuencia principal. Tien una temperatura superficial de 15.300 K y ye 710 vegaes más lluminosa que'l Sol. El so diámetru ye 3,8 vegaes más grande que'l diámetru solar y xira sobre sigo mesma con una baxa velocidá de rotación proyeutada de 11 km/s —anque otros estudios alcen esti valor hasta los 47 km/s—, lo qu'implica que probablemente'l so eje apunta escontra nós, siendo 17 díes la llende cimera del so periodu de rotación. La so masa ta entendida ente 4,8Zeta Sculptoris (Stars, Jim Kaler) y 5,5 mases solares y tien una edá averada de 40 millones d'años.
Zeta Sculptoris ye una binaria espectroscópica con un periodu orbital de 1740 díes, anque nada se sabe de la estrella acompañante. Per otra parte, una compañera de magnitú 13 separada visualmente 3 segundos d'arcu de Zeta Sculptoris, nun ta físicamente amestada con ella.
Zeta Sculptoris alcuéntrase a 503 años lluz del Sistema Solar. Na so mesma direición puede reparase el cúmulu abiertu Blanco-1; anque dacuando consideró-ylo miembru del mesmu, el cúmulu ta un 70% más alloñáu de nós y el so movimientu al traviés del cielu nun concasa col de Zeta Sculptoris.
Referencies
Categoría:Estrelles Categoría:Estrelles binaries Categoría:Constelación de Sculptor