Marc Lawrence foi un actor cinematográficu d'Estaos Xuníos, especializáu en personaxes de los baxos fondos. Nes sos películes tamién apaecía so los nomes de F. A. Foss, Marc Laurence y Marc C. Lawrence.
Biografía Vida personal El so verdaderu nome yera Max Goldsmith y nació na ciudá de Nueva York. La so madre yera d'orixe polacu y xudíu, Minerva Norma Sugarman, y el so padre yera Israel Simon Goldsmith, de raices rusa y xudía.Marc Lawrence Biography (1910-2005) Siendo estudiante formó parte d'obres teatrales d'aficionaos, y completó la so formación nel City College of New York. Tuvo casáu cola novelista y guionista Fanya Foss, cola que tuvo dos fíos, finando ella'l 12 d'avientu de 1995.
Marc Lawrence finó por un fallu cardiacu'l 28 de payares de 2005 en Palm Springs, California. Tenía 96 años d'edá. Foi enterráu nel Campusantu Westwood Village Memorial Park de Westwood (Los Angeles), California. El so fíu, Michael Lawrence, ye un escritor y artista que vive na islla griega d'Hidra, y que'l so llibru, My Voyage In Art, detalla les sos xuntes con dellos de los actores amigos de los sos padres. La fía de Marc Lawrence, l'actriz Toni Lawrence, tuvo casada col actor Billy Bob Thornton, y protagonizó xunto a so padre "Daddy's Deadly Darling".
Carrera interpretativa En 1930 Lawrence fixo amistá con otru mozu actor, John Garfield. Dambos actuaron en distintes obres de teatru primero que Lawrence consiguiera un contratu cinematográficu con Columbia Pictures. Lawrence empezó a actuar nel cine en 1931, faciendo Garfield lo propio en 1938. La cara picada de viruelas y l'esmolecedor aspeutu de Lawrence fixéron-y ideal pa interpretar a gángsters y personaxes de los baxos fondos a lo llargo de les siguientes seis décades.
Más p'alantre Lawrence foi sometíu a escrutiniu polos sos enclinos polítiques. Cuando foi llamáu a declarar ante'l Comité d'Actividaes Antiamericanes, almitió ser miembru del Partíu Comunista de los Estaos Xuníos. De resultes d'ello foi incluyíu na llista negra de Hollywood y hubo de exiliase a Europa, onde siguió faciendo cine. En sumiendo la llista negra, volvió a Estaos Xuníos, reiniciando'l so trabayu interpretativu encarnando a xente del hampa. Asina, encarnó a gángsters en dos películes de James Bond: la de 1971 Diamonds Are Forever, con Sean Connery, y la de 1974 The Man with the Golden Gun, con Roger Moore. Tamién interpretó a un secuaz nel filme de Laurence Olivier Marathon Man (1976), y a un estereotipáu xefe mafiosu de Miami na comedia de Jerry Reed y Dom DeLuise Hot Stuff (1979).
Unu de los sos últimos papeles foi'l de Mr. Zeemo nel episodiu de Star Trek: Deep Space Nine "Badda-Bing Badda-Bang". Amás, foi Gatherer Volnoth na entrega de Star Trek: The Next Generation "The Vengeance Factor".
En 1991 publicóse l'autobiografía de Lawrence, Long Time Non See: Confessions of a Hollywood Gangster (ISBN 0-9636700-0-X). Lawrence foi tamién l'asuntu d'una novela, The Beautiful and the Profane (ISBN 1-4107-0292-8/ISBN 978-14107029200)(publicada en 2002).
El so últimu papel pal cine tuvo llugar en Looney Tunes Back in Action, actuando como'l vicepresidente de la Corporación Acme.
Filmografía parcial
Referencies
Names You Never Remember, With Cares You Never Forget, by Justin Humphreys. BearManor Media, Albany, 2006. ISBN 1-59393-041-0.
Enllaces esternos
Categoría:Persones de Nueva York Categoría:Actores y actrices d'Estaos Xuníos