Marian Nixon foi una actriz cinematográfica d'Estaos Xuníos.
Biografía El so verdaderu nome yera Maria Nissinen, y nació en Superior, Wisconsin. Los sos principios fueron bien modestos, y dende los quince años d'edá dependió de sigo mesma.
Siendo adolescente empezó a actuar como baillarina de vodevil, y debutó nel cine en 1922. En 1924 foi escoyida pola Western Association of Motion Picture Advertisers como una de les WAMPAS Baby Stars, xunto a prometedores actrices como Clara Bow y Dorothy Mackaill.
Tres un aprendizaxe faciendo d'inocente en filmes de xéneru western, foi llogrando trabayos de protagonista femenina frente a estrelles masculines como Raymond Griffith, Reginald Denny, John Barrymore, Richard Barthelmess, y Al Jolson. Amás, foi una de les poques actrices del cine mudu que superó con ésitu la transición al cine sonoru, trabayando xunto a la nueva estrella masculina James Cagney en Winner Take All (O tou o nada) (1932), anque la so imaxe almibrada diba quedando pasu ente pasu desfasada. El so debú nel sonoru foi col papel de Mary Lane en Rainbow Man (1929), coprotagonizada por Eddie Dowling.
El 11 d'agostu de 1929 Nixon casóse con Edward Hillman Jr., na casa de los padres del noviu. El matrimoniu acabó en divorciu en 1933.
En 1934, intentó camudar la so imaxe interpretando un papel de comedia, al estilu de l'actriz d'esa dómina Gracie Allen, na película We’re Rich Again. El filme nun foi un ésitu. Sicasí foi beneficiosa nun aspeutu pa Nixon: casóse col direutor de la cinta, William Seitier, una unión que duró hasta'l fallecimientu d'él en 1964. Diez años más tarde, en 1974, la yá retirada Nixon casóse col actor y productor Ben Lyon, vilbu de l'actriz Bebi Daniels.
Marian Nixon finó en Los Angeles, California. Pola so contribución a la industria cinematográfica, recibió una estrella nel Paséu de la Fama de Hollywood.
Referencies Lima, Ohio, How Cupid Two-Timed The Millionaire Playboy, April 9, 1933, Page 25.
Referencies
Enllaces esternos
Fotografíes de Marian Nixon
Categoría:Actores y actrices de cine mudu