Pedro Ximénez de Préxamo (Logroño ¿? - 1495, Coria), foi un obispu, teólogu y escritor español del prerrenacimientu.
Biografía Estudió en Salamanca y foi l'únicu discípulu conocíu que tuviera Alonso de Madrigal, más conocíu como el Turráu. Foi colexal (profesor) de Teoloxía del Colexu Mayor de San Bartolomé xunto con Pedro de Osma, y depués canónigu y provisor de Segovia. Asistió al conceyu d'Alcalá de Henares onde se condergaron nueve tesis del De confessione del so antiguu compañeru Pedro de Osma. En 1484, como canónigu de Toledo, llogró'l deanazgo o cargu de canónigu maxistral de la catedral primada; foi nomáu, xunto col frai Hernando de Talavera, Comisariu xeneral y Colector del dineru de la Bulda de la Santa Cruzada y más palantre Sabela I impónlu como obispu escoyíu para Badajoz escribiendo una carta al cabildru (1486-1489); ellí amosóse como un gran y entusiasta proteutor de la imprenta, pa la que fizo dellos encargos qu'anden ente los primeros incunables españoles. Tuvo na conquista de Málaga (1487) colos Reis Católicos, y bendixo la mezquita. Terminó los sos díes como obispu de Coria (1489-1495). Nesta última ciudá decidió baltar l'antigua catedral románica y llevantar otra de góticu platerescu en 1498, la Catedral de Santa María de l'Asunción, anque según Antonio Ponz yá finara en 1495.
Obres Escribió escontra los errores de Pedro de Osma un tratáu "n'estilu inelegante y bárbaru" según pallabres del padre Juan de Mariana, pero con inxeniu agudu y escolásticu, de títulu Confutatorium errorum contra claves Ecclesiae nuper editorum explicit feliciter. Fuit autem confectum anno Domini M.CCCC.LXXVIII. Per reverendum magistrum Petrum Ximenes de Préxamo, tunc canonicum toletanum. Más conocíu foi'l so Lluceru de la vida christiana, (Salamanca, 1493; Burgos, 1495), traducíu al catalán (Barcelona, 1496). Esta obra catequística mandada faer polos Reis Católicos p'adoctrinar a recoyíos, allumaos y conversos del xudaísmu con cuenta d'evitar apostasíes. El padre Méndez creyó que Préxamo foi'l Pedro Ximénez que compunxo un poema sobre la Resurrección de Cristu incluyíu nel raru Cancioneru de Zaragoza (1492), tituláu Coples de vita Christi, etc. Amenorgó a compendiu en dos volúmenes los comentarios del so maestru'l Turráu sobre San Matéu, obra que foi impresa col títulu de Floretum (Sevilla, por Paulo de Colonia y Juan Pegnizer de Nuremberga, 1491). Finó en 1495 y ta soterráu en Coria, onde Antonio Ponz almiró la estatua genuflexa, obra de Copín, asitiada nel so sepulcru.Marcelino Menéndez Pelayo, Hestoria de los heterodoxos españoles... llibru III.
Referencies
Categoría:Escritores en llatín Categoría:Escritores en castellanu Categoría:Teólogos y teólogues d'España Categoría:Obispos d'España Categoría:Wikipedia:Mantenimientu:Persones ensin plantía NF Categoría:Wikipedia:Mantenimientu:Persones ensin plantía nym