Remi d'Auxerre , conocíu tamién como Remigius Antissiodorensis, foi un teólogu y monxu benedictín francés del Renacimientu carolinxu, gramáticu y bien prolíficu autor de comentarios y gloses a testos clásicos en llatín y griegu.
Biografía Foi alumnu de Lupus Servatus o Lope de Ferrières y d'Heiric d'Auxerre y maestru de la Escuela de l'Abadía de San Germán d'Auxerre (Saint Germain d'Auxerre) y depués en París y Reims. Acompañó al so maestru Heiric (876) y depués tomó'l so puestu estremándose na enseñanza de les artes lliberales y particularmente nel de la gramática, la dialéutica y la música. En 883 dexó Auxerre y coló a Reims, onde l'arzobispu Fulco lo llamara como profesor de la Escuela Catedralicia y ellí permaneció hasta 900, cuando se foi a París pa enseñar hasta que-y llegó la muerte en 908.
Obres El so pensamientu ta influyíu pol Platonismu y la Teoloxía del irlandés Juan Escotu Erígena, el so contemporaneu. La so obra, dafechu escrita en llatín, ta en parte perdida. Lo que queda d'él son amplios comentarios y reflexones sobre dellos llibros bíblicos y sobre la lliteratura y el pensamientu filosóficu de la dómina romana. Ente les sos obres representatives cítense los sos comentarios al Xénesis (Expositio super Genesim), a los Salmos (Enarrationes in Psalmos) y al Evanxeliu según San Mateo. Gran espardimientu tuvieron na Edá Media les sos reflexones amestaes a los gramáticos y comentaristes de l'antigüedá tardía (Donato, Prisciano, etc.) y a escritores llatinos como Boecio (De Consolatione Philosophiae y Opuscula sacra) y Marcianu Capella (De Nuptiis Philologiae et Mercurii et de septem Artibus liberalibus libri novem). Les sos obres apaecen recoyíes nel volume CXXXI de la Patrologia Latina de Migne y en Documenta Catholica Omnia.
Referencies
Enllaces esternos Obres en Documenta Catholica Omnia
Categoría:Benedictinos y benedictines de Francia Categoría:Gramáticos de Francia Categoría:Escritores en llatín Categoría:Teólogos y teólogues de Francia