Boletus regius ye un fungu basidiomicetu de la familia Boletaceae, qu'habita en montes de frondosas de zones templaes. Ye una especie pocu común que suel apaecer so la cobertoria d'árboles caducifolios, del tipu del castañu o'l haya, y que fructifica de forma solitaria o en grupos de dos o trés basidiocarpos, pel branu y principios de seronda. Ye una especie comestible, pero bien pocu frecuente. L'epítetu específicu "regius" significa "real", y fai referencia a la so bella coloración, presentando tonos coloráu rosado na cutícula del sombrerucu, mariellu dorao na zona de los poros y mariellu llimón nel pie. Enantes a la descripción d'esta especie per parte de Krombholz, considerábase-y una variedá de Boletus appendiculatus, na seición Calopodes.
Morfoloxía Tien un sombreru d'ente 6 y 15 cm de diámetru, esféricu nes sos fases tempranu y esplanao conforme va maureciendo'l esporocarpo. Ta cubiertu de fibrillas acolorataes sobre un fondu mariellu rosado pálidu. Conforme va avieyando, les tonalidaes van faciéndose más uniformes y apagaes, y la cutícula va sedándose. Los tubos y los poros son estrechos y amarellentaos, y van tomando tonos verdosos al maurecer. El pie ye daqué más anchu na base y de color mariellu llimón, y presenta n'ocasiones tonalidaes acolorataes na so parte cimera y un retículo mariellu bien finu. La carne ye blanca o mariellu llimón y el so color va faciéndose más intensu nes zones cercanes a los tubos y tomando tonos rosados na zona inferior del pie y na cercana a la cutícula. El so sabor ye duce y el so golor nidio. La esporada ye de color pardoolivácea.
Posibilidaes de tracamundiu Ye posible confundilo con especies allegaes como B. fechtneri y B. speciosus, dambos comestibles y tamién pocu comunes.
Referencies
regius Categoría:Fungos comestibles
Categoría:TBSpecies