El noruegu (norsk [nɔʂːk] o [nɔrsk]) ye una llingua nórdica falada principalmente en Noruega, onde ye llingua oficial. Xunto col suecu y el danés, el noruegu forma un continuum de variantes rexonales y locales más o menos intelixibles ente sí.
Estes trés llingües escandinaves continentales, xunto coles dos llingües insulares (el feroés y l'islandés) y otros idiomes yá estinguíos, constituyen lo que se conoz como llingües nórdiques (tamién llamaes xermániques septentrionales o escandinaves). El feroés y l'islandés yá nun son mutuamente intelixibles col noruegu na so forma falada, yá que l'escandinavu continental ye considerablemente distintu d'elles.
Esisten dos formes oficiales de noruegu escritu: bokmål [ˈbuːkˌmɔːl] (lliteralmente: «llingua del llibru», «llingua lliteraria») y nynorsk [ˈnyːˌnɔʂːk] (lliteralmente: «nuevu noruegu»). El Conseyu Llingüísticu Noruegu encamienta l'usu de los términos «noruegu bokmål» y «noruegu nynorsk».
Nun hai un estándar oficial pal noruegu faláu, pero'l sociolectu de la clase urbana media y alta de Noruega oriental, sobre'l que se basa'l bokmål, ye la forma que se suel enseñar a los estudiantes estranxeros. Esta forma, llamada standard østnorsk («noruegu oriental estándar») puede considerase l'estándar faláu de facto del bokmål.
Ente los sieglos XVI y XIX, el danés foi la llingua escrita estándar de Noruega. Por esta razón, el desenvolvimientu del noruegu modernu escritu foi oxetu de gran discutiniu en rellación col nacionalismu, l'enfrentamientu ente discursu rural y discursu urbanu y la historia lliteraria de Noruega. Históricamente, el bokmål ye una variante de danés norueguizada, mientres que'l nynorsk ye una llingua creada a partir de los dialeutos noruegos y el purismu llingüísticu en contra del danés. Anque agora yá s'abandonó, mientres un tiempu entamóse una política oficial que pretendía fundir el bokmål y el nynorsk nuna llingua común denominada samnorsk al traviés d'una serie de reformes ortográfiques. Tala política dio llugar a la creación d'un ampliu abanicu de formes alternatives tantu en bokmål como en nynorsk. La variante non oficial conocida como riksmål considérase más conservadora que'l bokmål, y la variante non oficial høgnorsk, más radical que'l nynorsk.
Los noruegos edúquense tanto en bokmål como en nynorsk. Una encuesta del añu 2005 indica que'l 86,3 % de la población utiliza principalmente'l bokmål como llingua escrita cotidiana, mientres que'l 5,5 % utiliza los dos y el 7,5 % utiliza principalmente'l nynorsk. Polo tanto solo'l 13 % escriben frecuentemente en nynorsk, anque la mayoría fala dialeutos que se paecen más al nynorsk que al bokmål. Polo xeneral, el bokmål y el riksmål son más comunes n'árees urbanes y suburbanes, y el nynorsk, sicasí, en zones rurales, especialmente en Noruega occidental. La Compañía Noruega de Radiotelevisión (NRK) emite en bokmål y en nynorsk, y toles instituciones gubernamentales tienen la obligación d'almitir les dos llingües escrites. El bokmål utilízase nel 92 % de les publicaciones escrites, y el nynorsk nel 8 % (2000). Magar la preocupación pa que los dialeutos noruegos pudieran dar pasu a una llingua noruega falada y común cercana al bokmål, los dialeutos atoparon un sofitu importante nos ambientes locales y na opinión popular, igual que na política.
El noruegu ye una de les llingües de trabayu del Conseyu Nórdicu. Según la Convención Llingüística Nórdica, los ciudadanos de países nórdicos que falen noruegu tienen la oportunidá de faer usu de la so propia llingua na interacción con órganos oficiales d'otros países nórdicos ensin tener que responsabilizase de los gastos de traducción o interpretación.
Historia
Del nórdicu antiguu a les distintes llingües escandinaves derecha|miniaturadeimagen|250x250px|Estensión aproximada del nórdicu antiguu y llingües allegaes a principios del sieglu X. L'área colorada representa la distribución del dialeutu nórdicu antiguu occidental»; la naranxa, la del «nórdicu antiguu oriental». L'área rosa ye'l gútnico antiguu y l'área verde señala la estensión d'otres llingües xermániques qu'entá yeren mutuamente intelixibles col nórdicu antiguu. Les llingües falaes anguaño n'Escandinavia desendolcáronse a partir del nórdicu antiguu, que la so estensión nun difería enforma de les árees onde güei se fala danés, noruegu y suecu. Ello ye que los comerciantes viquingos estendieron la llingua per Europa hasta Rusia, faciendo del nórdicu antiguu una de les llingües más estendíes del so tiempu. Según la tradición, el rei Harald Melota Formosa llevó la unidá a Noruega en 872. Nesta dómina taba n'usu un alfabetu rúnicu. Acordies colos escritos topaos nes tables de piedra d'esti periodu históricu, la llingua amosaba una notable falta d'esviación ente distintes rexones. Les runes taben usándose dende'l sieglu III. Sobre l'añu 1030, el cristianismu llegó a Noruega, trayendo consigo l'alfabetu llatín. Los primeros manuscritos noruegos qu'usaron el nuevu alfabetu empezaron a apaecer un sieglu dempués, pola mesma dómina na que'l noruegu empezó a estremase de los sos vecinos.
Los esploradores viquingos empezaron a establecese n'Islandia nel sieglu IX, portando consigo la llingua nórdica antigua. Col tiempu, el nórdicu antiguu foi estremándose en dos variantes: la occidental y l'oriental. El nórdicu occidental tomaba Noruega (incluyíos los sos asentamientos marinos n'Islandia, Groenlandia, les Islles Feroe y les Islles Shetland) y l'oriental, Dinamarca y Suecia. Les llingües d'Islandia y Noruega caltuvieron la so semeyanza hasta aproximao l'añu 1300, cuando se convirtieron no que güei se conoz como islandés antiguu y noruegu antiguu.
Mientres el periodu tradicionalmente fecháu ente 1350 y 1525, el noruegu sufrió una transición pasando del noruegu mediu al noruegu modernu. Los mayores cambeos fueron una simplificación de la morfoloxía, una sintaxis más fixa y una adopción considerable de vocabulariu del baxo-alemán mediu. Un desenvolvimientu similar tuvo llugar en suecu y danés, calteniendo'l continuum dialeutal intactu na Escandinavia continental. Sicasí, nun asocedió lo mesmo en feroés nin n'islandés, polo qu'estes llingües perdieron la intelixibilidá mutua mientres esti periodu.
Dominación danesa y sueca En 1397, la Unión de Kalmar unificó Noruega, Suecia y Dinamarca, y dende 1536 Noruega tuvo apoderada pol Reinu de Dinamarca y Noruega. El danés convirtióse na llingua escrita más común ente la clase culta de Noruega. El danés faláu foi adoptáu gradualmente pola élite urbana, de primeres nos eventos formales, y progresivamente fue adoptándose una variedá más relaxada pal discursu cotidianu. Esta variedá pasó por un procesu de koineización, qu'incluyía una simplificación gramatical y una pronunciación a la noruega. Col fin de la unión, en 1814 la llingua koiné dano-noruega pasara a ser la llingua materna d'una parte sustancial de la élite noruega, pero la variedá más solemne —con un soníu más cercanu al danés— siguió siendo utilizada n'ocasiones formales.
Pocu depués del fin de la unión con Dinamarca, Noruega foi forzada a entrar nuna nueva unión personal con Suecia. Sicasí, los noruegos empezaron a reclamar la independencia abrazando la democracia ya intentando faer cumplir la declaración constitucional de ser un estáu soberanu. Parte d'esti movimientu nacionalista concentróse nel desenvolvimientu d'una llingua noruega independiente. Embaraxábense trés posibilidaes: nun faer nada (llingua noruega escrita, esto ye: danés, distintu del suecu), norueguizar la llingua danesa, o construyir una nueva llingua nacional a partir de los dialeutos noruegos modernos. Los trés víes fueron puestes en práutica.
Del danés al noruegu Dende la década de 1840, dellos escritores esperimentaron con un danés norueguizáu qu'amestaba pallabres descriptives del paisaxe y la vida popular noruegos, y qu'adoptaba una sintaxis más noruega. Knud Knudsen propunxo camudar la ortografía y la flexón gramatical acordies cola koiné dano-noruega, conocida como «fala cotidiana culta». Los axustes nesta direición fueron aplicaos progresivamente en trés reformes oficiales en 1862, 1907 y 1917.
Mentanto, un movimientu nacionalista lluchaba pol desenvolvimientu d'un nuevu noruegu escritu. Ivar Aasen, un llingüista autodidacta, entamó la creación d'una nueva llingua noruega a los 22 años. Viaxó per tol país, comparando los dialeutos de distintes rexones, y analizó la evolución del islandés, qu'en gran midida safara les influencies que llegaren al noruegu. Aasen llamó al so trabayu, publicáu en dellos llibros ente 1848 y 1873, landsmål («llingua nacional»). El nome de landsmål interprétase dacuando como «llingua rural» o «llingua del campu», pero paez evidente qu'esti nun yera'l sentíu que-y otorgaba Aasen.
El nome de la llingua danesa en Noruega foi una tema de gran alderique mientres el sieglu XIX. Los sos proponentes afirmaben que se trataba de la llingua común de Noruega y Dinamarca, y que nun yera más danesa que noruega. Los partidarios del landsmål pensaben que'l calter danés de la llingua nun tenía de ser escondíu. En 1899, Bjørnstjerne Bjørnson propunxo'l nome neutru riksmål, que, al igual que landsmål, significa «llingua nacional». Esti nome adoptóse oficialmente cola reforma ortográfica oficial de 1907. El nome riksmål interpretábase n'ocasiones como «llingua estatal», pero esti sentíu ye como muncho secundariu, si lu comparamos col rigsmål danés, d'onde provién el nome.
Tres la disolución de la unión personal con Suecia en 1905, dambes llingües siguieron desenvolviéndose y algamaron lo qu'anguaño se considera les sos formes clásiques tres la reforma de 1917. El riksmål foi renomáu como bokmål («llingua del llibru») en 1929, y el landsmål pasó a llamase nynorsk («nuevu noruegu»). Una propuesta pa sustituyir «dano-noruegu» por bokmål salió perdiendo nel parllamentu por un solu votu. El nome nynorsk, el términu llingüísticu pal noruegu modernu, foi escoyíu pa contrastar col danés y sorrayar la conexón histórica col noruegu antiguu. Anguaño esti sentíu práuticamente perdióse y davezu entiéndese como un «nuevu» noruegu n'oposición al «auténticu» noruegu bokmål.
El bokmål y el nynorsk fixéronse más próximos con una reforma entamada'n 1938, como resultáu d'una política estatal que pretendía fundir el nynorsk y el bokmål nuna sola llingua, llamada samnorsk («noruegu común»). Una encuesta de 1946 amosó qu'esta política yera sofitada por un 79 % de los noruegos naquella dómina. Sicasí, los oponentes de tala política consiguieron crear un movimientu masivu de protesta contra'l samnorsk na década de los cincuenta, atacando especialmente l'usu de formes radicales» nos llibros de testu en bokmål usaos nes escueles. Na reforma de 1959, revocóse parcialmente la reforma de 1938, pero modificóse'l nynorsk entá más escontra'l bokmål. Dende entós el bokmål siguió reculando escontra'l riksmål tradicional, ente que el nynorsk entá s'empón pol estándar de 1959. Amás, una pequeña minoría d'entusiastes del nynorsk usa un estándar entá más conservador llamáu høgnorsk. La política del samnorsk tuvo bien poca influencia dempués de 1960, y foi oficialmente refugada en 2002.
Fonoloxía El sistema sonoru del noruegu ye similar al del suecu. Esisti considerable variación ente los distintos dialeutos, pero la variedá que de normal s'enseña a los estudiantes estranxeros ye'l standard østnorsk.
Consonantes Fonemes consonánticos del noruegu oriental BillabialLabiodental DentalAlveolar RetroflexaPostalveolar Palatal Velar GlotalOclusives Nasales Fricatives Líquides Aproximantes
Vocales