Harry Potter y la piedra filosofal, llamáu tamién Harry Potter 1 o abreviáu HP1 (títulu orixinal n'inglés, Harry Potter and the Philosopher’s Stone, sacante n'Estaos Xuníos, onde se tituló Harry Potter and the Sorcerer’s Stone), ye'l llibru primeru de la serie lliteraria Harry Potter, escritu pola autora británica J. K. Rowling en 1997, que supunxo amás el debú de Rowling como escritora profesional
La novela fora refugada por delles editoriales hasta que la editorial Bloomsbury decidióse a espublizala. La edición británica salió a la venta'l día 30 de xunu de 1997, siguida n'Estaos Xuníos el 1 de setiembre de 1998 pola edición de Scholastic Corporation. La Editorial Salamandra llogró nel añu 2000 los derechos pa la publicación del llibru en castellán y la Editorial Trabe fízose colos derechos pa la publicación n'asturianu nel añu 2009. En 2007, una primer edición roblada por Rowling subastóse en Londres por 27.876 llibres. Amás, esi mesmu añu comercializóse una edición conmemorativa de la novela.
Harry Potter y la piedra filosofal ganó dellos premios lliterarios nel Reinu Xuníu y nos Estaos Xuníos; n'agostu de 1999, llegó al visu de la llista best-sellers de ficción qu'apaez nel periódicu The New York Times quedando ente los primeros puestos del llistáu na mayor parte de los años 1999 y 2000. Xunto col restu de la serie de Harry Potter, esti volume recibió les crítiques de dellos grupos relixosos y foi prohibíu en dellos países por cuenta d'acusaciones de promover la bruxería. Sicasí, dellos comentaristes cristianos escribieron que'l llibru exemplifica importantes conceutos valoraos pola doctrina cristiana, incluyíu'l poder d'autosacrificiu y la forma en que les decisiones de les persones formen la so personalidá.
Realizáronse delles adautaciones de la novela, qu'inclúin audiollibros, videoxuegos y un llargumetraxe estrenáu en 2001. La película basada nel llibru contó cola direición de Chris Columbus y convirtióse nuna de les películes más taquilleres na historia del cine.
Argumentu Harry Potter crez na casa de los tíos, los Dursley, que-y escuenden la so verdadera hestoria familiar; al cumplir Harry once años, empiecen a llega-y cartes de remitente desconocíu, que van aumentando en númberu a midida que los sos tíos nun dexen que les abra. Estes trayen l'anuncia de que'l neñu foi almitíu nel Colexu Hogwarts de Maxa y Bruxería yá que, neto que los sos padres, tien poderes máxicos. miniaturadeimagen|290x290px|El Colexu Hogwarts ye'l principal escenariu onde asoceden los fechos de la serie de noveles. Descúbrese entós que los Potter nun morrieron nun accidente de coche como se-y dixera a Harry, sinón que foran asesinaos na nueche de Halloween por un bruxu tenebrosu conocíu como Lord Voldemort, qu'atemoriara a la comunidá máxica británica años atrás. Sicasí, daqué asocedió esa nueche: Voldemort consiguió matar al matrimoniu Potter pero nun pudo asesinar al ñácaru, perdió'l so cuerpu y dexó-y al neñu un repuelgu permanente en forma de rellampíu na frente.
Una nueche apaez Rubeus Hagrid pa llevase a Harry, cuando los Dursley intenten torgar que marche pal colexu. Más tarde, aquel ayuda a Harry a mercar el material escolar nel Caleyón Diagon y ellí decátase de que ye famosu ente los magos por sobrevivir al intentu d'homicidiu. Darréu, el rapazu toma'l tren que lu lleva a Hogwarts y ellí conoz a Ronald Weasley, un mozu roxu fíu de magos, y a Hermione Granger, una mocina d'orixe muggle con altes aspiraciones académiques. Los tres faense amigos y más tarde, nel cursu escolar, vense envueltos nuna serie d'episodios rellacionaos con un oxetu escondíu nes fondures del edificiu: la piedra filosofal, un artefautu col poder de tresmutar los metales n'oru y de producir l'elixir de la vida eterna. Distintos fechos fáen-yos suponer qu'ún de los sos profesores, Severus Snape, desea consiguir la piedra p'apurrí-yla a Voldemort, col que'l docente taría confabuláu.
En confirmando que l'espíritu d'aquel bruxu tenebrosu ronda'l castiellu y que la piedra ta en peligru, Harry, Ron y Hermione alerten a los profesores, pero estos torguen esa posibilidá yá que l'oxetu ta protexíu por diverses trampes nuna cámara soterraña nel colexu. Entós, los tres neños solos traviesen la trampiella vixilada por un perru de tres cabeces y vense sometíos a distintes pruebes hasta llegar a la recámara onde s'atopa la piedra. Harry descubre que'l profesor Quirinus Quirrell yera'l qu'intentaba robala dende'l principiu yá que Voldemort —que permanecía como parásitu na nuca'l profesor— ordenára-ylo. Harry consigue la piedra y Quirrel intenta asesinalu, pero nun consigue sobrevivir al contautu col rapazu y muerre cuando Voldemort abandona'l so cuerpu.Enantes de tentar d'asesinar a Harry, Voldemort acabara con Lily Potter, la madre del neñu. Esta, al interponese ente'l bruxu y el fíu, dio-y a Harry una proteición que torgaba que Voldemort lu tocara. Esa mesma maxa torga que Quirrel, que taba fusionáu col so amu, puea facer contautu con Harry. Al tocalu, Quirrel muerre pol fechizu proteutor de la so madre (La piedra filosofal p. 249).
Depués d'una charra reveladora col direutor del colexu, Albus Dumbledore, Harry torna pa colos sos amigos y parte de vuelta a la casa los tíos, una y bones l'añu llectivu concluyó.
Personaxes principales del llibru Harry Potter: ye'l protagonista de la novela. Güérfanu de dambos padres, Harry vive colos sos tíos, los Dursley y el so primu Dudley, que caltuvieron de callao la so verdadera identidá. Nel so oncenu cumpleaños, Harry empieza a recibir munches cartes del Colexu Hogwarts de Maxa y Bruxería nes que se-y informa de la disponibilidá d'una plaza pa que vaiga a estudiar. Rubeus Hagrid asístelu pa entamar el viaxe al colexu, ayudándolu a mercar el material escolar y a llegar a la estación King's Cross pa tomar l'Espresu Hogwarts. Nel colexu conoz a los que depués van convertise nos sos meyores amigos y xuntos descubren que Voldemort quier apoderase de la piedra filosofal pa consiguir la inmortalidá.
Ronald Weasley: el meyor amigu de Harry y Hermione. Vive cola so humilde familia nuna pintoresca casa conocida como "El Xoril". Ronald tien seis hermanos en total, de los que dos viven solos (Bill y Charlie), tres qu'asisten con él a Hogwarts (Percy, Fred y George) y la so hermana pequeña, Ginny. Na familia de Ron, toos son magos.
Hermione Granger ye una de los tres protagonistes y ye la meyor amiga de Harry y Ron. Ye una neña intelixente qu'alquiriera muncha conocencia sobre la maxa mesmo enantes d'entrar al colexu. Al igual que los sos amigos ye escoyida como alumna de la casa de Gryffindor. Amás de ser la que fai tolo posible pa evitar que los sos amigos se metan en problemes, la so intervención resulta vital nel intentu de consiguir la piedra filosofal primero que Voldemort, yá que la so conocencia ayúdenla a descifrar la cosadiella de les botelles que consistía en beber la correuta pa pasar poles llapaes de fueu que-yos torgaba pasar a la siguiente cámara. miniaturadeimagen|234x234px|L'escudu d'armes d'Hogwarts, colexu al que va Harry. Albus Dumbledore ye'l direutor de la escuela de maxa. Acompañáu por Hagrid y McGonagall, deposita al neñu de namái un añu d'edá na puerta de la casa de los Dursley. Según munches persones, Dumbledore ye la única persona que tarrez lord Voldemort, yá que se lu reconoz como ún de los magos más poderosos del sieglu. En Nadal apúrre-y a Harry una capa d'invisibilidá que perteneciera al padre del rapazu.En Nadal, Harry recibe la capa anónimamente; nun ye hasta lo cabero del llibru cuando Dumbledore-y confiesa a Harry que'l so padre emprestó-y la capa entes de morrer. A la fin del llibru mienta que por mutuu alcuerdu col alquimista Nicolas Flamel destruyera la piedra filosofal creada por esti pa evitar futuros inconvenientes. Minerva McGonagall ye la profesora de Tresformaciones; tamién ye la xefa de la casa Gryffindor y ocupa'l cargu de sodireutora nel internáu. McGonagall ye una animaga y puede adoptar la forma d'un muxu, y de esa manera vixila a la familia Dursley primero que lleven a Harry con ellos. Ye la persona que-y regala a Harry la so primer escoba voladora, la Nimbus Dos Mil, pa que puea xugar nel so primer partíu de quidditch. Draco Malfoy ye fíu d'una aristocrática familia de magos —de lo que se siente arguyosu— y un miembru de la casa Slytherin. Los sos padres —Lucius y Narcissa Malfoy— tuvieron del llau de Voldemort mientres la Primer Guerra. Siempre trata de meter a Harry, Ron y Hermione en problemes y desprecia a toles persones que seyan fíos de muggles, como ye'l casu d'esta última. Neville Longbottom ye un alumnu de la casa Gryffindor que se carauteriza pola so torpeza y mala memoria, razón pola que la so güela únvia-y una recordabola. Les sos habilidaes cola maxa son rudimentaries y de fechu la so familia pensaba que nun yera un magu hasta qu'un día cayó de l'azotea de la so casa y empezó a rebotar. Rubeus Hagrid ye un semixigante y el guardián de les llaves y tarrenes de Hogwarts. Depués d'enterase de que Harry nun recibiera les cartes del colexu, Hagrid va buscalu p'apurri-y en persona la misiva. Acompaña al protagonista nes sos compres pol caleyón Diagon, onde merca la so varina máxica y preseos escolares; amás, Hagrid mérca-y una curuxa a la que Harry pon-y de nome Hedwig, que va ser la mascota del rapazu y permitirá-y unviar y recibir correspondencia. Hagrid ye un gran aficionáu de les criatures máxiques, sobre manera d'aquellos seres peligrosos que'l restu del mundu tarrez, daqué que demuestra al mercar un dragón llombucrestáu noruegu que cría na so cabaña. Severus Snape ye'l xefe de la casa Slytherin y profesor de Fervidiellos, pero munchos alumnos rumoreen que'l profesor siempre quixo ser el docente titular de Defensa Escontra les Artes Escures. Dende l'empiezu de les clases, ye l'únicu maestru qu'amuesa perceguera por Harry y intenta castigalu. Snape conviértese nel principal sospechosu pa Harry y los sos amigos cuando empiecen a asoceder coses inusuales que depués van vese rellacionaes col paradoriu de la piedra filosofal; los tres suponen primermente que'l profesor quierla pa sigo, pero depués deducen que busca l'artefautu pa Voldemort. Sicasí, Snape resulta ser inocente y, amás, intentara salvar a Harry d'un intentu d'homicidiu de Quirrell. El Profesor Quirrell ye'l profesor de Defensa Escontra les Artes Escures y verdaderu ayudante de Voldemort. Cuando Harry llega a la recámara de la piedra alcuéntrase con Quirrell frente al Espeyu d'Uésed, nel que taba escondida la piedra. Solo a la fin de la novela descubre que Quirrell dexara que Lord Voldemort agospiara nel so cuerpu de manera parasitario. Quirrell nun sobrevive al enfrentamientu con Harry cuando la maldición de Lily Potter llaceria'l so cuerpu y Voldemort abandónalu. Lord Voldemort ye'l bruxu tenebrosu qu'apavoró'l Reinu Xuníu mientres la década de los 70 nun conflictu conocíu como la Primer Guerra. El so cuerpu foi destruyíu pola maldición que llanzó escontra Harry por causa de la intervención de la madre del ñácaru. Más tarde recluta a Quirrell pa consiguir la piedra filosofal y, d'esta miente, consiguir la inmortalidá.
Historia del llibru
Desenrollu miniaturadeimagen|240x240px|J. K. Rowling ye l'autora de la serie.