frameless|300px Restos arqueolóxicos de Çatalhöyük, asentamientu neolíticu d'Anatolia habitáu nel sieglu LXVII e.C. Sieglos: Sieglu LXVIII e.C. Sieglu LXVII e.C. Sieglu LXVI e.C.
El sieglu LXVII enantes de Cristu entamó'l 1 de xineru del 6700 e.C. y remató'l 31 d'avientu del 6601 e.C..
El sieglu formó parte del Neolíticu en distintes rexones d'Asia. N'Anatolia destacó'l desenvolvimientu del gran asentamientu de Çatalhöyük, mientres que n'otres rexones d'Asia esistíen comunidaes agrícoles como les de Mehrgarh, nel sur del continente, y Jiahu, nel valle del Ríu Mariellu.
Anatolia
Çatalhöyük, na llanura de Konya, foi ún de los mayores asentamientos neolíticos conocíos del periodu. La Unesco data la ocupación neolítica del montículo oriental ente aproximadamente 7400 y 6200 e.C., con dieciocho niveles d'ocupación. L'asentamientu taba formáu por grupos densos de cases construyíes unes contra otres, ensin cais ente elles y con accesu a los edificios principalmente pelos teyados.
Los estudios arqueolóxicos dividen la ocupación neolítica principal de Çatalhöyük en distintes fases. Hacia'l 6700 e.C. empezó'l denomináu periodu mediu, datáu aproximadamente ente 6700 y 6500 e.C. Nesta etapa la comunidá algamó'l so mayor tamañu, con una población estimada ente unes 3.500 y 8.000 persones.
La población vivía en cases de adobe que se reconstruyíen repetidamente sobre los restos d'edificios anteriores. Les escavaciones documentaron pintures murales, relieves, escultures, enterramientos baxo los pisos de les viviendes y otres manifestaciones simbóliques. La conservación y duración del asentamientu faen de Çatalhöyük un xacimientu fundamental pal estudiu de la vida sedentaria y de les primeres comunidaes agrícoles.
L'agricultura y la cría d'animales domésticos formaben una parte esencial de la economía de la comunidá. El crecimientu y la concentración de población en Çatalhöyük tuvieron acompañaos por cambios na alimentación, la movilidá, la carga de trabayu y les condiciones de salú de los sos habitantes.
Asia del Sur
Nel actual Paquistán taba habitáu'l xacimientu neolíticu de Mehrgarh, en Baluchistán. Les primeres comunidaes agrícoles de la rexón daten aproximadamente del VII mileniu e.C. y constitúin una de les evidencies más antigües de producción d'alimentos nel sur d'Asia.
Los habitantes de Mehrgarh cultivaben principalmente trigu y cebada y criaben ganáu vacuno, oveyes y cabres. Vivíen en construcciones de lladriyos de barru y fabricaben cestes y adornos de conches y piedres de colores. Dellos de los materiales utilizaos nos adornos procedíen de rexones alloñaes, lo que constitúi una evidencia de contactos y movimientos de productos a distancia.
Nesta fase temprana, Mehrgarh yera una comunidá neolítica ensin cerámica. Les primeres formes de cerámica documentaes nel xacimientu son posteriores, d'alredor del 5500 e.C.
China
Nel centru de l'actual China taba habitáu Jiahu, un asentamientu neolíticu de la provincia de Henan, nel valle del Ríu Mariellu. El xacimientu tuvo ocupáu aproximadamente ente 7000 y 5700 e.C. y incluyía viviendes, fornos, enterramientos y una cultura material formada por cerámica, ferramientes de piedra y güesu y oxetos de turquesa.
En Jiahu atopáronse flautes fabricaes con güesos de grulla de coronilla colorada. Seis exemplares conservaos considérense ente los instrumentos musicales completos, tocables y capaces de producir múltiples notes más antiguos conocíos. Les flautes tienen ente cinco y ocho furacos y podíen producir distintes notes musicales.
Nel xacimientu descubriéronse tamién signos tallaos sobre caparazones de tortuga. La so interpretación sigue siendo oxetu d'estudiu y nun se consideren un sistema d'escritura propiamente dichu, pero constitúin una de les manifestaciones simbóliques destacaes de la cultura neolítica de Jiahu.
Los asentamientos agrícolas de Cishan y Peiligang, tamién na China central, formen parte de les comunidaes neolítiques dataes aproximadamente ente 7000 y 5000 e.C. Estos poblaos practicaben l'agricultura y producíen cerámica relativamente simple, incluyendo recipientes con impresiones de cuerdes y otros elementos decorativos.
Referencies
Enllaces esternos
Categoría:Sieglu LXVII e.C.