José Ramón García Cañal ye un políticu asturianu. Ye diputáu na Xunta Xeneral del Principáu d'Asturies.
Tres estudiar el bachilleratu nel Colexu Loyola d'Uviéu (Escolapios), llicencióse en Química pola Universidá d'Uviéu en 1982.
Ingresa n'Alianza Popular en marzu de 1977, militando en Nuevas Generaciones, onde desempeñó, ente otros cargos, el de presidente de la Xunta Local d'Uviéu y el de presidente rexonal de Nuevas Generaciones (1980-1982). Nes eleiciones autonómiques de 1983 forma parte de la candidatura d'Alianza Popular a la Xunta Xeneral del Principáu. Nun consigue ser escoyíu diputáu direutamente, anque tres l'arrenunciu d'unu de los diputaos del Grupu Popular, toma posesión en 1986. Repitió candidatura, y foi escoyíu diputáu, nes eleiciones de 1987, 1991 y 1995. Tres estes postreres, y cola primer victoria del Partíu Popular n'Asturies que dexó a Sergio Marqués ser investido Presidente del Principáu, ye nomáu Vicepresidente del Gobiernu d'Asturies y Conseyeru de Cooperación.
Les diferencies de criteriu ente'l Presidente del Gobiernu, Sergio Marqués, y los dirixentes autonómicos y nacionales del PP, provocaron en 1998 una gran crisis de gobiernu, que motivó la fundación, per parte de Marqués, de la Unión Renovadora Asturiana. José Ramón García Cañal foi contrariu a les tesis del Presidente y permaneció nes files del PP, lo que llevó a la so destitución como Vicepresidente y Conseyeru del Gobiernu d'Asturies el 16 de xunu de 1998.
Nes eleiciones autonómiques de 1999 revalida'l so escañu y ye escoyíu Vicepresidente 1º de la JGPA. Repitiendo como diputáu nes eleiciones de 2003 y 2007.
Foi tamién Secretariu Rexonal d'Alianza Popular primeru, y del Partíu Popular dempués, ente 1983 y 1995.
Referencies
Enllaces esternos
Categoría:Persones d'Uviéu Categoría:Políticos y polítiques d'Asturies Categoría:Diputaos y diputaes pola provincia d'Asturies Categoría:Alumnáu de la Universidá d'Uviéu