Lyudmila Keldysh foi una matemática conocida por teoría de conxuntos y topoloxía xeométrica.
Biografía Lyudmila nació en 1904 n'Oremburgu, Rusia de Mariya Aleksandrovna (nacida Skvortsova) y de Vsevolod Mikhailovich Keldysh. La so familia venía de la nobleza rusa y yeren bien vistos antes de la Revolución rusa, más tarde tuvieron dificultaes por cuenta del so patrimoniu. El so padre yera un espertu de la construcción pal exércitu, camudándose frecuentemente y viviendo en Ḥélsinki ente 1905 y 1907, en San Petersburgu hasta 1909, y depués en Riga, Letonia. Vsevolod tomó un cargu ellí nel Institutu Politéunicu de Riga, hasta la invasión alemana de 1915 forzando a la familia a fuxir a Moscú, onde vivieron nel Distritu Losinoostrovsky. Keldysh terminó la so educación n'Ivanovo-Voznesensk, onde la familia treslladárase'n 1918. Siguió la so educación na Universidá Estatal de Moscú, graduándose en 1925. Mientres estudiaba, xunióse al grupu d'investigaciones de Nikolai Nikolaevich Luzin en 1923, y de Petr Sergeevich Novikov, con quién más tarde casó. Luzin publicó la so primera teoría matemática, que yera una evaluación utilizando fraiciones continues del cuartu conxuntu Borel en 1930.
Empezó a enseñar en 1930 nel Institutu d'Aviación de Moscú. Nesi tiempu, tuvo'l so primer fíu, Leonid Veniaminovich Keldysh, en 1931. En 1934, dexó l'Institutu d'Aviación y empezó a enseñar nel Institutu de Ciencies de l'Academia de la URSS especializándose'n teoríes de conxuntos. Esi añu, casó con Novikov y publicó tres artículos: «Sobre l'homeomorfismu d'elementos canónicos de la 3ª clase», «Sobre funciones cencielles de clase a» y «Sobre la estructura de funciones midibles B de clase a». Al añu siguiente, Stalin empezó les sos purgues y Keldysh perdió un tíu y un sobrín, y los sos padres fueron arrestaos, anque más tarde quedaron en llibertá. Nos próximos años, tuvo dos fíos más Andrei Petrovich Novikov y Sergei Petrovich Novikov, dambos notables matemáticos. Siguió la so busca en conxuntos de Borel y en 1941 defendió la so tesis, pero antes de recibir el grau la familia fuxó del avance del exércitu alemán. La mayoría de la Facultá del Institutu de l'Academia de Ciencies consideráronse evacuaos en llegando a Kazan, y Keldysh y los sos trés fíos fueron trataos como refuxaos. Atoparon agospiamientu nel ximnasiu de la Universidá de Kazán con dellos centenares d'otros refuxaos, hasta que llegó Novikov y recibieron un cuartu pa dormir. Novikov carecióse y riquió ciruxía.
En 1942, pudieron tornar a Moscú. Mientres esti tiempu tuvieron dos fíes, Nina y depués Elena, y Keldysh publicó «Sobre la estructura de conxuntos midibles B» en 1944, y siguió en 1945 con «Mapeos abiertos de conxuntos A», que marcó un puntu d'inflexón nel so trabayu. En 1945, publicó la so tesis centrada en topoloxía xeométrica. Siguió publicando de mediaos de los 1940s a los 1960s. La investigación de Keldysh foi honrada repetidamente nesti periodu recibiendo la Orde de la Bandera Colorada del Trabayu, Orde de Gloria Maternal de 2ᵘ grau y en 1958 el Premiu del Presidium del Sóviet Supremu. En 1964, foi profesora titular na Universidá Estatal de Moscú y en 1966 publica'l llibru «Enllaces topolóxicos nel espaciu euclidianu» p'ayudar al alumnáu a entender les sos clases. Siguió dando clases hasta 1974, cuándo dimitió en protesta pola espulsión d'unu de los sos alumnos. Novikov carecióse y finó en xineru de 1975. Ella fina un añu y un mes más tarde, el 16 de febreru de 1976 en Moscú.
Notes y referencies
Bibliografía
Enllaces esternos WorldCat Publicaciones
Categoría:Científicos y científiques de Rusia Categoría:Matemáticos y matemátiques de Rusia