Xurde Álvarez Fernández ye un poeta, narrador y autor de testos teatrales asturianu. Natural de la llocalidá llangreana de Sama, y llicenciáu n'Alministración y Direición d'Empreses pola Universidá d'Uviéu.
La so obra abarca narrativa, poesía y teatru, con traducciones a otres llingües y presencia n'antoloxíes y revistes.
Depués de dalgunes publicaciones conxuntes, Xurde Álvarez entama realmente la so carrera como escritor nel añu 1999, col asoleyamientu d'un poemariu de caráuter social tituláu "La sema".
Dividíu en tres partes, "Ería", "Semiente", y "Collecha", el llibru ye un repasu a una tierra resquebrada, sangrante; patria ensin ecu; ensin ecu de la so propia voz, erma de fe, erma de suaños, cayida a la vera'l camín que'l poeta acolumbra dende'l dolor común de lo propio.
Nel 2004, publica "No fondero de l'alcordanza de Dios", novela social na que s'espeya la dura y escarniada superviviencia d'una familia a lo llargo de los nueve meses que duraría la güelga más llarga d'Europa hasta entós, y que trescurriría dende payares de 1932 hasta agostu de 1933. Esta novela volverá a reeditase en 2023 quedando agotada de nuevo
Esi mesmu añu, algama con "Les llames del to llar antiguu", el premiu de testos teatrales de l'Academia de la Llingua Asturiana.
En 2008, vería la lluz "Tierra d'esperanza", poemariu que continúa la filosofía de "La sema" y na que s'engarcia'l final del llibru anterior para sobresalir la voz del nosotros en vez de la del yo, como se ficiere nueve años enantes.
Ya nel 2009, publica "La caída" primer poemariu non-social del autor y na que se cuenta, en forma diariu, la visión del mundu d'una persona dende'l día en que se produz el so esbarrumbe emocional hasta que ye a ver la primer migaya d'una lluz en forma d'esperanza.
En 2014, edítase la novela "Si'l temblor niega'l fríu", que cunta la vida de dos enfermeres nun hospital siquiátricu de l'Alemaña nazi y de los procesos d'estermín que sobre los enfermos con dalgún tipu de tara o deficiencia mental s'exercieron. Nesta obra dura, intensa, asfixiante d'entamu a fin l'ideal y el contraideal mécense ya intercámbiense pa dar llugar a un escarniáu retratu de la mente humana.
En 2015, torna a la poesía col poemariu escritu en forma de prosa poética y poemes "Lo escrito nel silenciu", qu'a traviés de 26 apuntes escritos a mou de diariu narra una historia d'amor dende'l so aniciu hasta la so resolución final.
En marzu de 2019, entama a asoleyar por pequeñes entregues la novela "Una casa", a traviés de la páxina de facebook unacasa.xurdealvarez .una casa ye la historia d’una familia minera. El padre, miembru de la brigada de salvamentu mineru rescatando y sacando muertos; la madre, muyer llabriega, postiando la casa con maderos de fe y de firmeza; la fía mayor rebalba, la pequeña espertando a la realidá y les sos verdaes; el neñu; el neñu entrando na mina; baxando a la tierra y a la escuridá de les sos cueves. Esta novela vería la lluz en forma llibru en 2021 siendo probablemente la obra de más repercusión mediática del autor . De les tres ediciones feches, too acabó escosao.
N'ochobre de 2023, tradúcese y espublízase en catalán la so novela "No fondero de l'alcordanza de Dios" baxó'l títulu "Al fons de la memòria de Déu".
Nel añu 2024, collabora col prestixosu grupu de música barroca Forma Antiqva nel discu De sópitu. Dirixíu pol direutor d'orquesta asturianu Aarón Zapico fai'l testu introductoriu a mou d'obertura y collabora xunto con Xesús González Rato nes traducciones al asturianu.
Tien amás hasta la fecha estremaes publicaciones, antoloxíes conxuntes, y collaboraciones en distintes revistes y publicaciones como Lliteratura, Lletres Asturianes, La ratonera, etc.
Obres Narrativa De madre a hija . Artnalón Letras, 1996. No fondero de l'alcordanza de Dios. Ediciones Trabe, 2004. (2ª Edición 2023) Si'l temblor niega'l fríu. Ediciones Trabe, 2014. Una casa. Ediciones Trabe, 2022. ISBN 978-84-18286-66-7
Poesía La sema. Ediciones Trabe, 1999. Tierra d'esperanza. Ediciones Trabe, 2008. La caída. Ediciones Trabe, 2008. Lo escrito nel silenciu. Amazon, 2015.
Teatru Les llames del to llar antiguu. Ganadora de la edición 2004 del Concursu de Teatru de l'Academia de la Llingua Asturiana. Academia de la Llingua Asturiana, 2005.
Traducíu a otres llingues (Catalán) Al fons de la memòria de Dèu. L'Agulla Daurada, 2023. ISBN 978-84-19515-10-0
Antoloxíes Al aldu, poesía pal segundu ciclu d'ESO. Ed. Trabe, 2006. L'albúm de Talía. Xunta Xeneral del Principáu d'Asturies, Ed. Ámbitu, 2006. Cuentos mínimos. Xunta Xeneral del Principáu d'Asturies, Ed. Ámbitu, 2007. Sentir que toi viva. Xunta Xeneral del Principáu d'Asturies, Ed. Ámbitu, 2008. 5 minutos d'averamientu a la prosa asturiana moderna. Conseyería de Cultura, Política Llingüística y Turismu, Ed. KRK ediciones, 2007. Caminos que naide triara. Xunta Xeneral del Principáu d'Asturies, Ed. Ámbitu, 2009. Contra'l silenciu. Esbilla y compilación de Berto García. Suburbia Ediciones, 2014. Surdiversu. Antoloxía de 50 años de poesía asturiana. Esbilla y compilación de Berto García. Cuatro gotes ediciones, 2024. Poetas del siglo XXI. Antología mundial + de 20.000 poetas. Antonio Sabido. La mina que nun cierra. Krk Ediciones, 2006. ISBN 978-84-96476-97-4
Revistes Reciella Malory, N 1, Ochobre 2004. La Ratonera, Revista asturiana de teatro, n 17, Mayo 2006. Lletres Asturianes, Academia de la Llingua Asturiana, númberos: 74, Mayu 2000; 77, Mayu 2001; 80, Mayo 2002; 83, Mayu 2003; 86, Mayu 2004; 89, Mayu 2005; 92, Mayu 2006; 95, Mayu 2007; 98, Mayu 2008. Lliteratura, N 24, Primavera 2007. Estandoriu, N 1, 2008. Lletres lliterariu, Academia de la Llingua Asturiana, númberu 1, Mayu 2009. Lliteratura, Revista Lliteraria Asturiana, númberu 42, Mayu 2026.
Collaboraciones musicales De sópitu, Forma Antiqva, Zapico Records, 2024
Referencies
Enllaces esternos
Xurde Álvarez en Turismo Langreo Videupoema
Categoría:Escritores d'Asturies Categoría:Escritores n'asturianu Categoría:Persones de Llangréu