La sede del Bancu Central Européu ye'l complexu principal del Bancu Central Européu (BCE), allugáu nel barriu d'Ostend de Frankfurt del Main, n'Alemaña. El conxuntu, diseñáu pol estudiu vienés Coop Himmelb(l)au, integra l'antiguu mercáu mayorista Grossmarkthalle con un rascacielos d'oficines. Les obres completáronse en payares de 2014 y el personal del BCE empezó a trabayar nel edificiu esi mesmu añu. La inauguración oficial celebróse'l 18 de marzu de 2015. La ceremonia coincidió con protestes convocaes pola rede anticapitalista Blockupy, nes que se produxeron disturbios y enfrentamientos cola policía.
El BCE escoyera'l terrén de la Grossmarkthalle en 2001 y mercólu a la ciudá de Frankfurt en marzu de 2002. Esi mesmu añu convocó un concursu internacional d'urbanismu y arquiteutura pal diseñu de la sede nueva. En febreru de 2004, el proyeutu de Coop Himmelb(l)au recibió'l primer premiu del concursu y, tres d'una fase de revisión, foi escoyíu definitivamente pol Conseyu de Gobiernu del BCE.
Carauterístiques thumb|La sede del BCE vista dende la ribera del Meno en 2026.
El complexu ocupa una superficie d'unos 120.000 m² y combina la Grossmarkthalle, construyida ente 1926 y 1928 según el diseñu del arquiteutu Martin Elsaesser, con una torre d'oficines formada por dos cuerpos poligonales coneutaos por un atriu. El rascacielos algama una altura máxima de 185 metros y el conxuntu tien unos 185.000 m² de superficie construyida. La restauración de la Grossmarkthalle conservó bona parte de la estructura histórica, al tiempu que nel so interior s'allugaron espacios de conferencies, el centru de visitantes y otres instalaciones del BCE.
La Grossmarkthalle tien amás una importancia histórica vinculada al Holocaustu. Ente 1941 y 1945, los suétanos del ala oriental usáronse como puntu de concentración pa la deportación de más de 10.000 xudíos de Frankfurt, que fueron treslladaos a guetos y campos de concentración y estermín. Anguaño'l llugar inclúi un memorial dedicáu a les víctimes, desarrolláu pola ciudá de Frankfurt, la comunidá xudía de la ciudá y el BCE. Dende 2025, el BCE yá nun ocupa la Eurotower: completó'l treslláu del personal d'esi inmueble al edificiu Gallileo, nel centru de Frankfurt. En 2026, la institución tien instalaciones na sede principal de Sonnemannstrasse, nel Gallileo y nel Japan Center.
Cronoloxía
1928: inaugúrase la Grossmarkthalle, mercáu mayorista de frutes y verdures de Frankfurt. 1941-1945: los suétanos del ala oriental úsense como puntu de concentración pa la deportación de más de 10.000 xudíos de Frankfurt. 2001: el BCE escueye'l terrén de la Grossmarkthalle como allugamientu pa la so sede futura. 2002: el BCE merca'l terrén y convoca un concursu internacional d'urbanismu y arquiteutura. 2004: Coop Himmelb(l)au consigue'l primer premiu del concursu arquiteutónicu. 2008: la ciudá de Frankfurt concede'l permisu definitivu de construcción. 2010: empiecen les principales obres de construcción y el 19 de mayu colócase la piedra fundacional. 2012: el 20 de setiembre celébrase la finalización de la estructura principal del complexu. 2014: terminen les obres y el personal del BCE empieza a trabayar na sede nueva. El 4 d'avientu celébrense nél per primer vegada una reunión del Conseyu de Gobiernu y una rueda de prensa del BCE. 2015: el complexu inaugúrase oficialmente'l 18 de marzu. El 22 de payares inaugúrase nel recintu'l memorial dedicáu a los xudíos deportaos dende la Grossmarkthalle nel Holocaustu. 2016: el BCE abre per primer vegada la sede de manera regular a visitantes individuales, con visites guiaes mensuales pela Grossmarkthalle y la torre d'oficines. 2017: inaugúrase'l 4 d'ochobre el Centru de Visitantes del BCE nel complexu, concebíu como un espaciu interactivu pa esplicar les funciones de la institución y con capacidá prevista pa recibir unes 40.000 persones al añu. 2019: el BCE, la ciudá de Frankfurt y el Museu Xudíu de Frankfurt empiecen a celebrar añalmente na sede actos de conmemoración de les deportaciones dende la Grossmarkthalle alredor del Día Internacional de Conmemoración en Memoria de les Víctimes del Holocaustu. 2025: el BCE dexa d'ocupar la Eurotower y tresllada'l personal d'esi edificiu al Gallileo, quedando la sede de Sonnemannstrasse como'l principal centru de trabayu de la institución.
Ver tamién Barriu européu Economía de la Unión Europea Llista de rascacielos en Frankfurt
Referencies
Enllaces esternos
Edificiu principal del Bancu Central Européu
Categoría:Bancu Central Européu Categoría:Rascacielos d'Alemaña