Seventh Son of a Seventh Son () ye'l séptimu álbum d'estudiu de la banda británica de heavy metal Iron Maiden, llanzáu en 1988. Trátase d'un álbum conceptual sobro la historia d'un vidente; el séptimu fíu d'un séptimu fíu, que tendría facultaes psíquiques como la clarividencia y otres mancies.
Cada cantar rellata un tramu de la vida d'esti personaxe, dende la nacencia "Moonchild", el descubrimientu de los sos poderes y el so destín "Can I Play with Madness" y la so inminente muerte "Only The Good Die Young".
Al igual que nel so álbum anterior, Somewhere in Time, prevalez l'usu de sintetizadores que mientres la xira foron executaos pol téunicu asistente de Steve Harris, músicu ya inxenieru en soníu; Michael Kenney.
Magar l'álbum ye conceutual, les lletres de los cantares tamién contienen de forma implícita cierta crítica social y política más carauterística d'otros álbumes de la banda.
Esti álbum ye consideráu como una de les grandes obres maestres d'Iron Maiden, y que dexó redefinir el Heavy Metal, y qu'espeyóse nel más grande Monsters of Rock de tolos tiempos fechu n'Inglaterra.
Tresfondu La idea de basar l'álbum tocante al conceutu folclóricu del "séptimu fíu d'un séptimu fíu" ocurióse-y al baxista Steve Harris dempués de lleer El séptimu fíu del escritor d'Estaos Xuníos Orson Scott Card. Harris declaró: "Yera'l nuesu séptimu álbum d'estudiu y yo aínda nun tenía'l títulu o dalguna idea n'absolutu. Entós lleí la historia del "Séptimu fíu", esta figura mística que se supón que tien toos estos dones paranormales, como la clarividencia, y yera más, de primeres, como que namái sería un bon títulu pal séptimu álbum, ¿sabes? Pero entós llamé a Bruce y empezamos a falar al respeutu y la idea a cencielles creció".
Dempués de que les sos contribuciones de compositor foren refugaes nel anterior álbum de la banda, Somewhere in Time de 1986, Bruce Dickinson sintió que la so participación na banda menguara, convirtiéndose "namái nel cantante", pero'l so entusiasmu anovóse cuando Harris esplíco-y el conceutu del álbum; "Pensé, '¡qué gran idea!, ¡xenial!' y claro, taba bien allegre tamién, porque inclusive me llamara para falar d'ello y entrugóme si tenía dalgún cantar que pudiera encaxar nesi tipu de tema. Yo andaba como que 'bonu, non, pero dame un minutu y voi ver lo que puedo faer'". Falando tocante al álbum n'años siguientes, Dickinson remarcó que "casi llogramos daqué bono'", esplicando que, "nun yera dafechu un álbum conceptual. Nun había un intentu de velo como una historia continua, como realmente tuvimos de facer. Seventh Son... nun tien historia. Ye sobre'l bien y el mal, el cielu y l'infiernu, pero ¿nun lo ye tou álbum de Maiden?".
Lletres
Referencies
Categoría:Álbumes d'Iron Maiden Categoría:Álbumes conceutuales Categoría:Álbumes d'EMI Records Categoría:Álbumes de heavy metal