Cristina Gallo Suárez ye una periodista deportiva y escritora española, autora del llibru Lágrimas por una medalla al pie de la ex-ximnasta Tania Lamarca, y dende mayu de 2015 direutora y presentadora del programa de radio Ganamos con ellas na RPA, dedicáu a les muyeres asturianes del ámbitu deportivu.
Biografía En 1995 llicencióse en Ciencies de la Comunicación pola Universidá Europea de Madrid. Trabayó nes emisores Antena 3 Radio, COPE y Onda Cero, como redactora xefe y direutora de Conteníos del programa Supergarcía, presentáu por José María García. Yera la responsable de los conteníos del programa, guión y organización interna de la redaición, tanto la central como la de los corresponsales. Pa eses emisores cubrió dellos Xuegos Olímpicos y campeonatos mundiales d'atletismu (Sevilla 1999, Edmonton 2001) y ximnasia rítmica (Sevilla 1998, Madrid 2001), amás d'otres competiciones de yudu, ḥoquei sobre patinos, vela o motociclismu. Dirixó tamién los portales d'internet Libredirecto.com y Masdeporte, amás de diseñar otres páxines web (www.biciclistas.es).
N'abril de 2008 publicó'l llibru Lágrimas por una medalla, del que ye autora xunto a Tania Lamarca. El llibru ye l'autobiografía novelada de la campeona olímpica de ximnasia rítmica Tania Lamarca, y narra la so esperiencia como deportista d'élite y la so vida en retirándose de la competición.
Dende 1998 especializóse en meses redondes y congresos sobro olimpismu y sobro'l papel de la muyer nel mundu del deporte. Collabora col Conseyu Cimeru de Deportes pa la ellaboración del boletín electrónicu de Programas Mujer y Deporte, que tien como oxetivu visibilizar a les muyeres nel ámbitu deportivu. Tamién collaboró col mesmu organismu na ellaboración del llibru Deporte y muyeres nos medios de comunicación. Suxerencies y encamientos (2011), que'l so oxetivu ye sensibilizar y ameyorar el tratamientu de la información sobro les deportistes femenines y les muyeres que trabayen nel mundu deportivu. Dende 2012 forma parte del GAPAS-D (Grupu de Sofitu pa la Prevención del Abusu Sexual Infantil nel Deporte), qu'estudia la incidencia de los casos d'esti problema n'España y busca medios pa la so prevención. Dende mayu de 2015 dirixe y presenta el programa de radio Ganamos con ellas na RPA, un magazín sobro les muyeres asturianes que se dediquen al ámbitu deportivu. En 2016 foi nomada vicepresidenta de l'Asociación de Muyeres pal Deporte Profesional (AMDP). Anguaño mora en Corella (Navarra).
Filmografía
Programes de radio Programes de radio Añu Títulu Emisora Notes 1988 - 1992 Supergarcía en la hora cero Antena 3 Radio Redactora de Deportes 1992 - 2000 Supergarcía COPE Redactora xefe de Deportes 2000 - 2002 Supergarcía en la onda Onda Cero Direutora de Conteníos 2015 - anguaño Ganamos con ellas RPA Direutora y presentadora
Programes de televisión Programes de televisión Añu Títulu Cadena Notes 2012 Equipo de investigación Antena 3 Entrevistada nel reportaxe «El método Tarrés» 2018 Salvados La Sexta Entrevistada nel reportaxe «Los reyes de la noche»
Ver tamién Lágrimas por una medalla Supergarcía
Referencies
Enllaces esternos
Cristina Gallo en Linkedin Blogue de Tania Lamarca y Cristina Gallo Facebook oficial del llibru Lágrimas por una medalla Facebook oficial del programa de radio Ganamos con ellas Páxina web de l'Asociación de Muyeres pal Deporte Profesional
Categoría:Persones d'Uviéu Categoría:Escritores d'Asturies Categoría:Periodistes d'Asturies