Kaija Anneli Saariaho foi una compositora finlandesa.
Kaija Saariaho estudió composición en Ḥélsinki, Freiburg y París, onde vivió dende 1982. Los sos estudios nel IRCAM tuvieron una gran influencia na so música y les sos testures, carauterísticamente luxoses y misterioses, son creaes al traviés d'un amiestu de música en direuto y producciones electróniques. Anque la mayoría de les sos composiciones son obres de cámara, dende mediaos de los noventa evolucionó escontra unes obres de mayor fuercia y estructures más amplies, tales como óperes, Salzburg Festival (que s'estrenó nos Estaos Xuníos en 2002), y Oltra mar, solicitada pola Orquesta Filarmónica de Nueva York.
Ye unu de los músicos más solicitaos pa componer ópera. La so primer ópera L'amour de loin (L'amor de lloñe), estrenada en 2000 el Festival de Salzburgu foi un gran ésitu que dexó ser representada n'otros escenarios de tol mundu. La so segunda ópera Adriana Mater foi encargada pola Opera Nacional de París pa 2006 y en 2010 estrenó la so tercer ópera Émilie en Lyon, basada na vida de la matemática Émilie du Châtelet. Nos trés pieces, el llibretu foi escritu por Amin Maalouf.
Biografía Kaija Saariaho nació en Ḥélsinki y estudió música na Academia Jean Sibelius con Paavo Heininen y fundó, xunto a Magnus Lindberg y otros, el grupu “Ears Open”. Darréu ameyoró les sos conocencies en Friburgu (so la direición de Brian Ferneyhough y Klaus Huber) y nos cursos de branu de Darmstadt. Dende 1982, prosiguió los sos estudios nel IRCAM de París, ciudá a la que se treslladó a vivir dende entós.
Nesta institución, Saariaho desenvolvió nueves téuniques de composición, por aciu l'emplegu de la electrónica en vivu, el trabayu cola cinta y l'asistencia computarizada. Al empar, empezó'l so interés pola escritura pa orquesta. La traza más particular de les sos composiciones orquestales d'esta dómina ye la creación de trupes mases de soníu en permanente y paulatín tresformamientu. Amás, l'estudiu de les téuniques d'analises del espectru sonoru por ordenador llevaes a cabu polos compositores espectralistas franceses ayudólu a crear el so propiu llinguaxe harmónicu, carauterizáu por una cuidada notación rica en marques d'espresión onde caben dende l'usu frecuente d'harmónicos hasta los detalles microtonales d'un continuum sonoru que parte dende'l tonu temperado hasta'l ruíu ensin afinación precisa y viceversa.
El so trabayu na década de los ochenta y noventa ta remarcáu por un énfasis nel timbre y nel usu de la música electrónica nacida de preseos tradicionales, esencialmente de la cultura nórdico y oriental. Nymphéa (Xardín secretu III) (1987), por casu, ye un cuartetu de cuerda con música electrónica.
A finales de los 90 empezó a componer ópera y otros xéneros de música vocal como un ciclu de cantares (Quatre instants, 2002) o un oratoriu (La Passion de Simone) collechando un gran ésitu ente crítica y públicu. Cola collaboración del periodista y escritor Amin Maalouf como libretista y de Pete Sellars como direutor de producción, estrenó tres óperes hasta la fecha (L'amour de loin, 2000; Adriana Mater, 2006; y Émilie, 2010).
Por cuenta de la so esperiencia na composición vocal, la so música foi evolucionando escontra posiciones más modales tocantes a lo melódico en combinación col emplegu de patrones rítmicos y harmónicos más regulares. Estos cambeos pueden percibise n'obres como Notes of Light (2006), pa cello y orquesta, o Lanterna Magica (2008), pa orquesta.
Una de les carauterístiques más notables que caracteriza tola obra musical de Saariaho ye la so asociación con un círculu estable de collaboradores: Peter Sellars, Amin Maalouf, el chelista Anssi Karttunen, la flautera Camiya Hoitenga, el direutor Esa-Pekka Salonen, la sopranu Dawn Upshaw, o'l pianista Enmanuel Ax, ente otros.
Ganó'l Prix Italia y, en 1989, el Premiu Ars Electronica. Recibió tamién menciones del Lincoln Center y del IRCAM.
Nel añu 2000 ganó'l Nordic Council Music Prize pol so trabayu Lonh pa sopranu y música electrónica.
En 2013, foi gallardoniada col Premiu Polar, xunto al músicu Youssou N'Dour
Resume de la so carrera 1976-81 - Estudió composición con Paavo Heininen na Academia Jean Sibelius, Ḥélsinki. 1982 - Apriende composición musical por ordenador na IRCAM, de París y afita la so residencia na capital francesa. 1986 - Gana'l Premiu Kranichsteiner en Darmstadt. 1989 - Gana'l Premiu Ars Electronica por Stilleben and Io; y treslládase un añu a la Universidá de San Diego. 1991 - Compón la música pal ballet Maa, y consigue el premiu del Ballet Nacional de Finlandia. 2001 - Premiu Schock, dau por un comité de la Real Academia Sueca de Música. 2003 - Gana'l Premiu Grawemeyer de Composición pola so obra L'amour de loin (ópera estrenada con un montaxe de Peter Sellars) 2011 - Premiu Musical Léonie Sonning 2013 - Premiu Polar de Música (concedíu ex aequo a Youssou N'Dour) 2017 - Premiu Fundación BBVA Fronteres de la Conocencia
Catálogu d'obres