Montserrat "Montse" Gatell Pérez ye una política española, diputada provincial na Diputación Provincial de Barcelona por CiU. Foi l'alcaldesa (2004-2007) de Castellar del Vallès.
Biografía Montse Gatell Pérez nació l'añu 1971 en Sabadell y dende entós vive en Castellar del Vallès. Llicenciada en Filoloxía Árabe, empecipió la so trayeutoria como rexidora del Conceyu de Castellar del Vallès nel añu 1999 por Convergència i Unió. Dende entós foi la responsable de diversos departamentos dientro del consistoriu, como cultura, ociu, mocedá, educación y comunicación y, dende'l principiu del so mandatu foi, aparte de l'alcaldesa, la rexidora del Área de Servicios a les Persones.
L'añu 2004, l'alcalde Lluís Maria Corominas Díaz dimite pa ocupase de la so acta de diputáu nel Parllamentu de Cataluña y como secretariu d'organización de CiU. Entós, Montserrat Gatell ye escoyida alcaldesa de Castellar del Vallès.
Fora del ámbitu políticu, Montse Gatell ye miembru del Esbart Teatral de Castellar, entidá na que desenvolvió diverses actividaes, como participar en numberosos espectáculos como actriz y formar parte de la Xunta Directiva. Nel ámbitu profesional, foi profesora de secundaria y redactora nuna empresa de xuegos educativos. Foi miembru de la Comisión Pedagóxica de SOS Racisme y collaboró na redaición d'unes fiches didáctiques sobre Diversidá Multicultural nos colexos. Tien publicaos un cuentu infantil na coleición de cuentos de La Xarxa y un cuentu p'adultos col que quedó finalista nel concursu lliterariu Mercè Rodoreda.
Referencies
Enllaces esternos
Categoría:Alcaldes y alcaldeses de Cataluña Categoría:Alcaldes de Convergència i Unió Categoría:Políticos y polítiques d'España Categoría:Alcaldes y alcaldeses d'España Categoría:Persones de Sabadell