Pehr Evind Svinhufvud foi un políticu finlandés y el tercer presidente de la República de Finlandia (1931-1937).
Llicenciáu en derechu, antes de la independencia de Finlandia (el 6 d'avientu de 1917), Svinhufvud yera diputáu nel grupu del estáu noble, nel cual formaba parte de la minoría finoparlante. Mientres el periodu de opresión per parte de Rusia, Svinhufvud puxaba pol principiu de llegalidá, lo que traxo de resultes que tuvo deportáu, n'exiliu forzáu, en Siberia mientres trés años (1914-1917). Na seronda de 1917, tres la so vuelta a Finlandia, Svinhufvud formó'l llamáu «Senáu d'independencia» que redactó la declaración d'independencia. Dempués de la guerra civil de 1918, Svinhufvud foi escoyíu rexente del periodu interín, pero, por cuenta de les sos idees monárquiques y pro-alemanes, tuvo que dimitir yá n'avientu del mesmu añu.
En 1930 foi escoyíu diputáu pol Partíu de Coalición Nacional (conservador) y un añu más tarde, en 1931, llegó a la presidencia. Como presidente Svinhufvud siguía'l principiu de llegalidá y, col so prestíu personal, pudo aselar la llamada «rebelión de Mäntsälä», un intentu de la estrema derecha de desestabilizar l'orde políticu del país, primero que'l llamáu «movimientu de Lapua», lideráu por Vihtori Kosola, tuviera tiempu d'estropiar la nueva democracia finlandesa.
Como persona Svinhufvud tenía la fama de ser un home del pueblu (a pesar del so orixe nobiliariu), colo que mereció, na boca de la xente, el llamatu de Ukko-Pekka (‘abuelito Pedro’). El so apellíu, Svinhufvud, significa «cabeza de gochu» en suecu y cúntase que'l mesmu mandatariu solía gastar chancies al respeutu.
Referencies
Enllaces esternos
Categoría:Políticos y polítiques Categoría:Presidentes de Finlandia Categoría:Primeros ministros de Finlandia Categoría:Políticos y polítiques de Finlandia Categoría:Políticos y polítiques del PCN