Marta Navarrete Llinás ye una química, doctora en neurociencies ya investigadora española, ganadora del Premiu Olympus para Mozos Investigadores, dau pola Sociedá Española de Neurociencia pol so llabor científica. Ye coautora de delles publicaciones académiques y en prensa especializada sobre la función de los astrocitos como fonte de señalización, espandiendo'l modelu d'almacenamientu celular d'información que se basaba namái na actividá neuronal. Los sos estudios tamién se centraron na implicación de los astrocitos nos procesos d'adicción a les drogues y n'enfermedaes neurodexeneratives como'l Alzheimer.
Estudios y trayeutoria profesional Empezó la so carrera na Universidá d'Estremadura nel campu de la química cuántica, siguió como investigadora nel Institutu Cajal (CSIC), nel Albert Einstein College University (NY), y dende 2014 trabaya nel Centru de Bioloxía Molecular Severo Ochoa (CSIC). Ta interesada nel estudiu del papel que xueguen los astrocitos (les célules más abondoses del sistema nerviosu central) nos procesos de memoria, procesu d'información y aprendizaxe y les sos implicaciones y, tanto fisiolóxiques como patolóxiques, na función cerebral.
Los sos trabayos contribuyeron a demostrar que la fisioloxía cerebral nun resulta puramente de l'actividá neuronal sinón de l'actividá alcordada de redes astroneuronales, revelando una mayor capacidá computacional del celebru nos procesos de deprendimientu y memoria. Esto ye, los astrocitos sirven de ponte ente neurones que nun s'atopen direutamente coneutaos. Santiago Ramón y Cajal orixinalmente postuló la posibilidá de que los astrocitos pudieren tener una función adicional a ser tan solu soportes pasivos de les neurones. A finales del sieglu consiguiéronse les primeres evidencies d'ello y l'equipu lideráu pol profesor Alonso Araque del que Navarrete formó parte consiguió evidencies científiques pa demostralo.
En marzu de 2008 Marta Navarrete y Alonso Araque publicaron un artículu na revista Neuron apuntando a la implicación de los astrocitos nos procesos d'adicción a les drogues. Según l'estudiu, la estimulación de los receptores de cannabinoides en astrocitos activa una nueva vía de comunicación ente neurones por aciu la lliberación del tresmisor glutamato.
En marzu de 2016 Navarrete impartió un seminariu na Universidá Pablo de Olavide sobre la comunicación ente astrocitos y neurones na enfermedá d'Alzheimer. Según los sos estudios, los astrocitos tán arreyaos na muerte neuronal que se produz nos pacientes de la enfermedá.
Los sos estudios espanden el modelu Hebbiano incorporando los astrocitos como fonte de señalización al modelu d'almacenamientu celular d'información que se basaba namái na actividá neuronal y contribúin por tanto a amontar la conocencia de los procesos fundamentales nel funcionamientu del sistema nerviosu, identificando elementos celulares y moleculares como dianes pal desenvolvimientu de estrategías terapéutiques nel tratamientu del sistema nerviosu.
Publicaciones Navarrete participó como coautora de más de 20 estudios publicaos en diversos medios como Neuron o PLOS Biology. Los sos trabayos fueron citaos en múltiples ocasiones, a nivel internacional, por autores d'otres investigaciones nel campu. Según el doctor José Luis Trejo, vicepresidente de la Sociedá Española de Neurociencia les publicaciones de Navarrete llograron algamar un gran índiz d'impautu.
Ente les sos publicaciones atópense:
Comunicación ente neurones y astrocitos mediada por endocannabinoides (Tesis presentada'l 22 de mayu de 2009). Conclúi que los astrocitos participen viviegamente na fisioloxía del sistema nerviosu. Según esperimentos detallaos na tesis los atrocitos alcontraos nel hipocampu de los mures cunten con receptores CB1 que s'activen por endocannabinoides y esplica los efeutos producíos tres la so activación: Aumentos del ión calciu (Ca2+) intracelular, activación de proteínes G y PLC, lliberación de glutamato, segeración de corrientes lentes d'entrada (conocíes como SIC) nes neurones piramidales del CA1. Conclúi tamién que por aciu l'acción combinada de endocannabinoides y glutamato los astrocitos realicen la función de ponte na comunicación non sináptica ente neurones lo cual supón una nueva vía de señalización. En 2015 la Sociedá Española de Neurociencia declaró que Navarrete demostró que los astrocitos tán arreyaos na tresmisión y almacenamientu d'información nel sistema nerviosu.
Tripartite synapses: astrocytes process and control synaptic information. Publicáu en 2009. Apurre evidencies d'una comunicación bidireccional ente neurones y astrocitos que denomina sinápsis tripartita. Según l'estudiu los astrocitos intervienen direutamente nel control de la tresmisión sináptica y na so plasticidad. Ente los trabayos nos que participó Navarrete, esti estudiu ye'l que más vegaes foi citáu. Utilizar como referencia 658 publicaciones a nivel mundial.
Astrocytes Mediate In vivo Cholinergic-Induced Synaptic Plasticity. Publicáu en 2012. Considerada pol Institutu Cajal como la so publicación más importante.
Astrocyte Calcium Signal and Gliotransmission in Human Brain Tissue. Publicáu en 2013, Esperimentos realizaos en biopsies cerebrales de pacientes humanos epilepticos indicarón que los astrocitos humanos al igual que n'estudios anteriores realizaos con astrocitos d'animales tamién respuenden a l'actividá sináptica.
Astrocytes in endocannabinoid signalling. Publicáu en 2014, detalla la importancia de los astrocitos nos procesos sinápticos, y apurre evidencies de la so integración nel sistema endocannabinoide y de la so función reguladora de la tresmisión sináptica y la so plasticidad por aciu l'activación de los receptores de cannabinoides de tipu 1 nos astrocitos qu'aumenta'l calciu intracelular y aguiya la emisión de glutamato.
Beques premiu y reconocencies En 2014 el so proyeutu “Alteración na comunicación bidireccional ente astrocitos y neurones na enfermedá del Alzheimer” foi premiáu na primer edición d'Ayudar Fundación BBVA a Investigadores y Creadores Culturales. En 2015 recibe'l Premiu Olympus para Mozos Investigadores. Sociedá Española de Neurociencia. En 2015 la Beca L'Oreal-Unesco.
Referencies
Enllaces esternos Cux1 Enables Interhemispheric Connections of Layer II/III Neurons by Regulating Kv1-Dependent Firing
Categoría:Científicos y científiques d'España Categoría:Persones de la provincia de Badajoz