La Vuelta a Vetusta ye una carrera ciclista de pocos díes que se disputa n'Uviéu. Ye válida pa les categoríes "Élite" y "sub 23". Nun se corría diba 19 años hasta qu'en 2018 volvió a disputase, organizada pol PCM Team Oviedo y la Federación Asturiana de Ciclismu y cola collaboración del Conceyu d'Uviéu.
2018 N'esta edición participaron 25 equipos (4 asturianos), xuntando 170 ciclistes. Foron 2 etapes, entamando'l 10 d'agostu n'Uviéu y final nel altu L'Angliru; al otru día la etapa tuvo entamu y final na capital asturiana. La primer etapa salió d'Uviéu y terminó nel altu de L'Angliru tres percorrer 117 km. Ganó'l corredor ucraniu Anatolii Budiak, del equipu ULB Sports. El percorríu de la segunda y última etapa foi de 160 km, con salida na catedral d'Uviéu y final na cai Uría. Julen Amarika, del equipu Telco.m Ederlan Frenkit, ganó esta etapa al esprín y l'ucraniu Anatolii Budiak foi'l vencedor final de la carrera.
2019 La carrera de 2019 disputóse los díes 10 y 11 d'agostu de 2019, corriendo casi 200 ciclistes xebraos en 20 equipos, 3 d'ellos de fuera d'España. La primer etapa salió de la cai Tenderina y llegó al Naranco tres percorrer 142 km de distancia.. El ganador foi'l corredor chilenu Elias Tello (del equipu Team Kuota-Construcciones Paulino), delantre del so compañeru Aliaksandr Piasetski. La segunda etapa salió de la cai Río Dobra con direición a Cualloto y final na cai Argüelles, con un percorríu 143 km, tres pasar por delles llocalidaes del conceyu de Siero. Ganó'l corredor Ángel Fuentes, del equipu Gomur-Cantabria Infinita nel esprín de la meta. Elias Tello foi'l ganador final de la carrera.
Referencies
Categoría:Deporte n'Uviéu Categoría:Competiciones de ciclismu Categoría:Ciclismu n'Asturies