Mireia Vehí i Cantenys ye una socióloga, activista y política española. Foi diputada de la CUP nel Parllamentu de Cataluña y en payares de 2019 encabezó la llista eleutoral d'esti partíu pa les sos primeres eleiciones xenerales. Anguaño ye diputada y pertenez al Grupu Mestu del Congresu de los Diputaos.
Biografía Nacida en 1985 na llocalidá ampurdanesa de Vilafant, siendo fía d'Agustí Vehí, subinspector de la guardia urbana de Figueres, y Consuelo Cantenys, alcaldesa de Vilafant pol PSC dende 2009, asina como la hermana grande de Pau y Laia Vehí, cantantes del dúu musical North State. Llicencióse en Socioloxía en 2010 pola Universidá de Granada. Con una amplia trayeutoria activista, participó nel movimientu okupa de la ciudá andaluza. Dempués empecipió un posgráu en Sociedaes Africanes y Desenvolvimientu na Universitat Pompeu Fabra y un máster en Muyeres, Xéneru y Ciudadanía nel Institutu Interuniversitariu d'Estudios de Muyeres y Xéneru. Ye miembru de la xunta del Centru d'Estudios Africanos y Interculturales y representante de la campaña Cerramos los CIEs.
Trayeutoria Milita na CUP dende 2015, foi incluyida nel númberu 8 de la llista del partíu por Barcelona de cara a les eleiciones al Parllamentu de Cataluña de setiembre de 2015. Convirtióse en diputada en xineru de 2016, cubriendo una de les vacantes creaes polos arrenuncios de Julià de Jòdar, Josep Manel Busqueta y Antonio Baños. Con acta parllamentaria mientres el restu de la llexislatura, darréu formó parte del Secretariáu Nacional del partíu. Considerada como próxima a Endavant, n'ochobre de 2019 foi propuesta pola militancia como cabezalera de llista por Barcelona al Congresu de los Diputaos nes elecciones xenerales de payares de 2019.
Notes
Referencies
Enllaces esternos
Categoría:Políticos y polítiques de Cataluña