thumb|El chinu Ding Liren, anguaño campeón del mundu
El Campeonatu del Mundu d'axedrez reconoz a los campeones mundiales d'esti deporte oficialmente dende l'últimu cuartu del sieglu XIX, cuando Wilhelm Steinitz autoproclamóse campeón del mundu.
En 1993 el mundu del axedrez dixébrase a resultes del enfrentamientu del entós campeón Kasparov cola FIDE, y dende esi añu fasta que nel 2006 se restauró la paz, hebo dos campeonatos (y dos campeones) del mundu distintos al mesmu tiempu. Dende 2014 el formatu consiste en ciclos de dos años, surdiendo un campeón o una campeona tolos años pares. Anque'l campeonatu de 2020 treslladóse a 2021 por culpa del andanciu de la COVID-19.
Dende que derrotó a Viswanathan Anand nel 2013, l'anguaño campeón Magnus Carlsen defendió esitosamente'l títulu nel 2014, nel 2016, nel 2018 y nel 2021. Por embargu, nun va volver a facelo nel Campeonatu del Mundu d'axedrez de 2023 dempués de refugar él mesmu participar.
Anque'l campeonatu ta abiertu a tol mundu, hai torneos y títulos separtaos pa muyeres, mocedá (pa xugadores fasta 20 años, anque tamién hai eventos específicos pa xente más mozo), y xente mayor (homes de más de 60 años y muyeres de más de 50). Tamién esisten campeonatos mundiales pa les versiones rápides (Campeonatu del Mundu d'axedrez rápidu y Campeonatu del Mundu d'axedrez rellámpagu) y pa seleiciones nacionales (Campeonatu del Mundu d'axedrez por equipos). Fasta hai un Campeonatu del Mundu d'axedrez pa ordenadores abiertu a hardware y programes informáticos d'axedrez.
Historia Na primer metá del sieglu XIX surdió la idea d'un campeón del mundu d'axedrez, falándose d'ella con estes pallabres per primer vegada en 1845. Dende esi momentu, dellos xugadores fueron aclamaos como campeones del mundu, pero'l primer tornéu que se definió per delantre como campeonatu del mundu foi la serie ente Steinitz y Zukertort de 1886 que ganó'l primeru. Como dende entós los torneos del campeonatu del mundo fueron series alcordaes privadamente ente los xugadores, y nos albores del sieglu XX d'avezu les negociaciones yeren un pilancu que retrasaba o incluso suspendía los retos pol títulu, hebo intentos d'algamar unes regles qu'afitaran por exemplu la frecuencia de los campeonatos, qué podía imponer el campeón y qué non o les aportaciones económiques a facer (el financiamientu vinía de la mano de los propios xugadores, gracies a les aportaciones de partidarios qu'apostaben por ún o otru) y el repartu de premios.
Anque en 1887-1889 hebo un primer intentu d'organizar el campeonatu del mundu de manera esterna l'esperimentu nun cuayó nin se repitió fasta que en 1948 la FIDE garra'l control y afítase un sistema pa organizar los torneos de manera regular. El so funcionamiento foi aceutable fasta que en 1993 les desavenencies de Kasparov y Short, campeón y aspirante respeutivamente, cola FIDE a cuenta de la organización del campeonatu d'esi añu acabaron con un cisma que diba durar más d'una década. La reunificación tendría llugar con ocasión del campeonatu del añu 2006, anque los compromisos que la ficieron posible fueron aplicándose a poco a poco nos campeonatos celebraos darréu. Tres de la xuntanza de los títulos, la FIDE caltién el drechu d'organizar la serie del campeonatu del mundo, que fáese en ciclos de dos años. Campeones non oficiales (pre-1886)
thumbnail|left|Representación de la serie ente Howard Staunton y Pierre Saint-Amant del 16 d'avientu de 1843, que consideróse un campeonatu del mundu non oficial. thumb|Paul Morphy xugando escontra'l maestru d'axedrez húngaru Johann Löwenthal.
La primer serie de partíes proclamada polos xugadores como campeonatu del mundo foi la que Wilhelm Steinitz-y ganó a Johannes Zukertort en 1886. Por embargu, una riestra xugadores veníen siendo consideraos como los más fuertes (o los más famosos) del mundu dende facía sieglos, poro delles vegaes son consideraos campeones del mundu de la so época: Ruy López de Segura a mediaos del sieglu XVI (al que'l rei español Felipe II mandó a xugar escontra los más poderosos xugadores d'aquella), Paolo Boi and Leonardo da Cutri a finales del mesmu sieglu y Alessandro Salvio y Gioachino Greco nos primeros años del sieglu XVII.
Fueron los xugadores franceses los que dominaron el mundu del axedrez nel sieglu XVIII y principios del sieglu XIX con Legall de Kermeur (1730–1755), François-André Danican Philidor (1755–1795), Alexandre Deschapelles (alredor de 1800–1821) y Louis-Charles Mahé de La Bourdonnais (1821–1840). Esti últimu, en 1834 xugó seis series (y 85 partíes) escontra l'irlandés Alexander McDonnell en dalgo asemeyao a un campeonatu del mundu.
En 1840, un columinsta del “Fraser's Magazine” escribió: “¿Pa quién será'l bastón de mandu cuando lu dexe La Bourdonnais, y qué país proporcionará al socesor? Anguaño de La Bourdonnais, como Alexandru Magnu, nun tien herederu y hai razones pa temer que finalmente l'imperiu pueda ser dividíu ente dellos reis minúsculos.”
Tres morrer La Bourdonnais n'avientu desi mesmu añu, la victoria del inglés Howard Staunton nuna serie escontra'l francés Pierre Charles Fournier de Saint-Amant en 1843 fai que seya dende entós consideráu'l xugador más fuerte del mundu. Una carta nomada en The Times el 16 de payares de 1843, pero de xuru escrita antes, describió que na segunda serie de partíes de Staunton escontra Saint-Amant, xugada en París nos meses de payares y avientu de 1843, taba en disputa'l “cetru doráu de Philidor." La primer vegada de la qu'hai constancia del usu del términu “campeón del mundu” ye en 1845, cuando Howard Staunton foi descritu como “el campeón d'Inglaterra d'axedrez, o (…) el campeón del mundu".
thumb|left|Howard Staunton ta consideráu como'l xugador d'axedrez más fuerte del mundu na década de los 40 del sieglu XIX.
La primera propuesta conocida pa definir de mano un tornéu que decidiera'l meyor xugador del mundu fízola Ludwig Bledow nuna carta que-y escribió a von der Lasa nel añu 1846 y que publicó'l Deutsche Schachzeitung en 1848: "... el ganador de la batalla en París nun debiera tar demasiáu arguyosu de la so posición especial, porque ye en Trier onde va a facese la primer coronación” (anque Bledow morrió en 1846 y el tornéu proupuesto nun tuvo llugar). Unos años dempués, el Tornéu Internacional de Londres foi espresamente descritu como'l campeonatu del mundu por tres comentaristes: una carta de “un miembru del Calcutta Chess Club" fechada el 1 d'agostu de 1850 y otra del Capitán Hugh Alexander Kennedy d'ochobre del mesmu añi, nel volumen de 1850 de 'Chess Player's aChronicle; y Liberty Weekly Tribune de Missouri el 20 de xunu de 1851. Pero Anque Kennedy yera miembru del comité organizador del tornéu, nun hai prueba nenguna que coronar a un campeón del mundu fuera l'oxetivu oficial del eventu.
El Tornéu de Londres de 1851 ganólu l'alemán Adolf Anderssen, lo que lu convirtió nel líder mundial del axedrez y fizo que se falara d'él como'l primer maestru d'axedrez modernu. Pero nun hai nenguna prueba de que gracies a la so victoria se-y aclamara entós como campeón del mundu, anque en 1893 Henry Bird nomólu asina por esi títulu.
thumb|left|Paul Morphy (Luisiana, Estaos Xuníos) un prodixu del axedrez que dominó a toa oposición al mesmu na so curtia carrera. Dao lo impresionante de los sos llogros, fasta dempués de morrer nun hebo nenguna serie oficial del campeonatu del mundu.
El propiu Anderssen foi derrotáu en 1858 una serie al xugador de los Estaos Xuníos Paul Morphy, tres de qu'esti fuera aclamáu perdayuri como campeón del mundu. Morphy xugó series de partíes escontra munchos xugadores destacaos, arrasando en toes elles. Harper's Weekly el 25 de setiembre de 1858 The American Union el 9 d'ochobre de 1858 consideráronlu campeón del mundu pero otru artículu de Harper's Weekly tamién del 9 d'ochobre de 1858, C. H. Stanley nun taba seguru si podía faltase de la serie de partíes de Morphy escontra Harrwitz como campeonatu del mundu. Poco dempués, Morphy ufría peones y movimientos raros a quien xugara escontra d'él, nun alcontrando siquiera asina rivales y acabando por dexar l'axedrez al añu siguiente, anque munchos consideráronlu campeón mundial fasta que morrió en 1884. La so retirada de sópitu tando na cume conozse como “l'arguyu y pena del axedrez”. Ensin Morphy n'activu, Anderssen tornaba a ser otra vuelta'l xugador más fuerte del momentu, y la so reputación reforzóse entá más cola so victoria nel Torneú de Londres de 1862.
Wilhelm Steinitz ganó por escasu marxe a Anderssen nuna serie en 1866 considerada por dellos comentaristes como'l primer campeonatu del mundu “oficial”, anque daquella nun foi consideráu asina y nun foi sinón tres de morrer Morphy en 1884 cuando una serie lo fuera, lo que supón un testimoniu nidiu del dominiu de Morphy nel xuegu, pues hai que tener en cunta que tevo 25 años ensin xugar públicamente. L'emplegu del términu “campeón del mundu” camuda nesta dómina pero paez que polo menos pa Steinitz el so reináu mundial entamó nesa serie de 1866.
Johannes Zukertort ganó'l Tornéu de París de 1878 (ensin la participación de Steinitz) y darréu'l Tornéu de Londres de 1883 con una ventaya de 3 puntos sobre cualesquier otru xugador, incluyíu Steinitz. Asina, considerábase a Steinitz y Zukertort como los dos meyores xugadores del mundu y esto llevó a la serie inaugural del campeonatu del mundu ente ellos, el Campeonatu del Mundu d'axedrez de 1886. El títulu foi pa Steinitz, que ye por ello reconocíu como'l primer campeón munddial oficial, anque la serie nun se xugó al abellugu de nengún organismu oficial. Graham Burgess numbera a Philidor, de la Bourdonnais, Staunton, y Morphy como los xugadores que fueron aclamaos como los meyores del so tiempu.
Campeones del mundu antes del títulu FIDE (1886-1946) El campeonatu foi organizáu de manera bastante informal el restu del sieglu XIX y na primer metá del sieglu XX: si un xugador pensaba que yera lo bastante fuerte, él (o los sos siguidores) andaben a la gueta del financiamientu pal bote de la serie y retaben al campeón del mundo; siendo'l nuevu campeón en casu de ganar. Nun había un sistema formal de clasificación, pero normalmente considerábase que'l sistema yera válidu y que los campeones yeren los meyores de cada momentu, Steinitz, Emanuel Lasker, José Raúl Capablanca, Alexander Alekhine, y Max Euwe, caún d'ellos derrotando al anterior campeón nuna serie de partíes. El reináu de Wilhelm Steinitz
El dominiu de Wilhelm Steinitz descata porque d'él ye la primera evidencia que suxer que un campeón del mundu pue perder el títulu por refugar a un aspirante creyible o por una ausencia de la competición llarga, la primer vegada que se xuega un campeonatu del mundu (qu'amás foi definíu asina per delantre) porque la propuesta de 1846 de Bledow quedó en nada, el primer intentu de regular torneos pal campeonatu del mundu, los alderiques sobre si el campeonatu tenía que decidise nuna serie partíes o nun campeonatu, y les diferencies ente comentariestes (nun solucionaes anguaño) sobre cuándo entamó'l so reináu.
Nun hai pruebes de que Steinitz reclamara pa sí mesmu'l títulu darréu ganar una serie escontra Adolf Anderssen en 1866, anque na so International Chess Magazine de setiembre de 1887 y abril de 1888 reclamaba ser camepón dende 1866. Dizse que pue que Steinitz nun ficiera la reclamación mientres vivió Paul Morphy, que ganara a Anderssen por un marxe mayor en 1858 pero retiráu de la competición dalgo dempués de volver a los Estaos Xuníos en 1859 y que morrió en 1884. La primera referencia a Steinitz como campeón del mundu foi en Chess Player's Chronicle d'ochobre de 1872, dempués de ganar a Johannes Zukertort na so primer serie. Pero New York Times el 11 de marzu de 1894, British Chess Magazine n'abril de 1894 y Emanuel Lasker en Lasker's Chess Magazine en mayu de 1908 fechen el so reináu dende 1866, siguiendo'l so exemplu Reuben Fine a principios de los años 50.