«Напалеон» () — эпічны гістарычны фільм рэжысёра і прадзюсара Рыдлі Скота паводле сцэнарыя Дэвіда Скарпы. Расказвае пра прыход Напалеона Банапарта да ўлады і яго адносінах з жонкай Жазэфінай. Напалеона сыграў Хаакін Фенікс (які таксама з’яўляецца прадзюсарам), Жазэфіну — Ванеса Кірбі. 22 лістапада 2023 года карціна выйшла ў пракат, 9 студзеня 2024 года пачаўся лічбавы рэліз. Зборы фільма па ўсім свеце склалі 218 мільёнаў долараў пры бюджэце 130—200 мільёнаў. Водгукі крытыкаў былі неадназначнымі: фільм хвалілі за батальныя сцэны і пастаноўку, але пры гэтым крытыкавалі за гістарычныя недакладнасці.
Сюжэт Дзеянне фільма пачынаецца ў 1793 годзе. Малады афіцэр Напалеон Банапарт назірае за пакараннем смерцю каралевы Марыі-Антуанэты. Пазней ён прапануе камісару Полю Барасу план узяцця Тулона і асабіста вядзе салдат на начны штурм, які заканчваецца перамогай. У 1795 годзе Банапарт душыць паўстанне раялістаў у Парыжы, расстраляўшы натоўп з гармат. Ён ажэніцца з удавой арыстакрата Жазэфіна дэ Багарнэ; нягледзячы на бурнае сексуальнае жыццё, гэты шлюб застаецца бяздзетным.
У 1798 годзе Банапарт высаджваецца ў Егіпце і атрымлівае перамогу ў Бітве ля пірамід, але спяшаецца дадому, калі даведаецца, што ў Жазэфіны ёсць палюбоўнік. Правадыры Дырэкторыі абвінавачваюць яго ў дэзерцірстве, ён высоўвае сустрэчныя абвінавачванні і здзяйсняе дзяржаўны пераварот, заняўшы пасаду першага консула. У 1804 годзе папа рымскі карануе Напалеона як імператара французаў. Міністр замежных спраў Талейран прапануе Аўстрыі саюз, але атрымлівае адмову. Пачынаецца вайна, Напалеон перамагае аўстрыйцаў і рускіх пры Аўстэрліцы. Ён прымушае да міру Аўстрыю, у 1807 годзе заключае саюз з Аляксандрам I. Маці Напалеона прымушае яго правесці ноч з 18-гадовай дзяўчынай, тая зацяжарвае, і гэта становіцца доказам бясплоднасці Жазэфіны. У 1810 годзе Напалеон разводзіцца з жонкай, захаваўшы добрыя адносіны з ёй, і жэніцца з Марыяй-Луізай, дачкой Франца II. Праз год яна нараджае сына.
У 1812 годзе Напалеон урываецца ў Расію. Адбываецца Барадзінская бітва, французы заходзяюць у апусцелую Маскву. Уначы Напалеон прачынаецца ад шуму і зарыва, бо ў горадзе пачаўся пажар. Французская армія аказваецца ў сэрцы варожай краіны пасярод зімы. Напалеон загадвае адыходзіць, ад паўмільённай арміі застаецца не больш 40 тысяч чалавек. У 1814 годзе яму даводзіцца адрачыся ад прастола і адправіцца на востраў Эльба. Праз год Напалеон даведаецца, што Жазэфіна вярнулася да свецкага жыцця. Ён пакідае востраў і высаджваецца ў Францыі, усе войскі пераходзяць на яго бок. Жазэфіна памірае ад дыфтэрыту да прыезду Напалеона. Саюзнікі спешна сцягваюць вялізныя сілы, пры Ватэрлоа яны атрымліваюць канчатковую перамогу. Напалеона і яго служак ссылаюць на востраў Святой Алены. У ссылцы ён піша мемуары і выкладае слухачам версію гісторыі, у якой ён заўсёды мае рацыю. Напалеон памірае ў 1821 годзе, пачуўшы, як Жазэфіна кліча яго на новую сустрэчу.
Фільм змяшчае шэсць маштабных батальных сцэн[: у прыватнасці, гэта бітвы пры Тулоне, Пірамідах, Аўстэрліцы, Барадзіно і Ватэрлоа. Крыніцы
Катэгорыя:Фільмы 2023 года