Сход неабыякавых — серыя палітычных форумаў, арганізаваных у 2025 годзе групай апазіцыйных да рэжыму Лукашэнкі палітычных сіл, якія адначасова знаходзяцца ў апазіцыі да Офіса Святланы Ціханоўскай. Асноўнымі арганізатарамі выступілі партыя «Народная Грамада» (пад кіраўніцтвам Яўгена Вільскага), частка партыі «Беларуская хрысціянская дэмакратыя» (пад кіраўніцтвам Георгія Дзмітрука) і рух «Краіна для жыцця» (пад кіраўніцтвам Віталя Савюка).
Мэтай сходаў дэкларавалася «знаходжанне стратэгічнага рашэння для развязвання беларускага палітычнага крызісу», пераадоленне «крызісу даверу» і стварэнне альтэрнатыўнага цэнтра прыняцця рашэнняў.
Першы Сход неабыякавых (Варшава) Першы сход адбыўся 21 чэрвеня 2025 года ў Варшаве. Арганізатарамі выступілі былыя палітвязні Сяргей Пятрухін і Сяргей Коршун, блогер Віталь Кандраценка, а таксама актывіст Міхаіл Кучараў. Мерапрыемства пазіцыянавалася як круглы стол для абмеркавання пытанняў лідарства ў дэмакратычным руху.
На сход быў запрошаны дарадца Святланы Ціханоўскай Франак Вячорка. Яго выступ быў перарваны крыкамі «Ганьба!», а частка ўдзельнікаў дэманстратыўна павярнулася да яго спінай. Вячорка быў вымушаны пакінуць мерапрыемства, адзначыўшы пазней, што падобныя паводзіны не спрыяюць кансалідацыі.
Другі Сход неабыякавых (Вільня) Другі сход прайшоў 21 лістапада 2025 года ў Вільні. Частка мерапрыемства адбылася ў будынку Сейма Літвы пры падтрымцы еўрадэпутата ад Літвы Пятраса Аўштравічуса. Арганізатары анансавалі стварэнне «Беларускай нацыянальнай кааліцыі» (БНК), якая павінна стаць «пераходным органам стратэгічнага кіравання і прадстаўніцтва беларускага народа».
У мерапрыемстве прынялі ўдзел каля 40 чалавек, у тым ліку палітык Вольга Карач, прызнаная ў Літве пагрозай нацыянальнай бяспецы, а таксама актывісты Антон Малкін, Міхаіл Кучараў і Алена Філатава (Хэлен Мінская).
Крытыка і кантэкст Удзельнікаў і арганізатараў сходаў крытыкуюць за спробы раскалоць дэмакратычны рух. Палітычныя сілы, якія стаяць за ініцыятывай (БХД Дзмітрука, «Народная Грамада» Вільскага, «Краіна для жыцця»), паказалі нізкія вынікі на выбарах у Каардынацыйную раду ў 2024 годзе (сумарна менш за 3 % галасоў). Акрамя таго, шэраг звязаных з гэтымі структурамі асоб апынуліся замяшанымі ў скандалах з супрацоўніцтвам са спецслужбамі (напрыклад, Яўген Дудкін з БХД і некаторыя члены «Народнай Грамады»).
Крыніцы
Катэгорыя:Палітыка Беларусі Катэгорыя:Палітычныя арганізацыі Беларусі Катэгорыя:Беларуская эміграцыя Катэгорыя:Падзеі 2025 года Катэгорыя:2025 год у Варшаве Катэгорыя:2025 год у Вільні