Пара́фія Хрыста́ Чалавекалю́бцы — грэка-каталіцкая парафія ў горадзе Маладзечна Мінскай вобласці. Уваходзіць у склад Цэнтральна-заходняга протапрэзбітэрыята Беларускай грэка-каталіцкай царквы (БГКЦ).
Гісторыя Парафія была ўтворана ў канцы 1991 года. Першы малебен адбыўся 25 снежня 1991 года ля капліцы на месцы могілак па вуліцы Гарадоцкай. Яго адслужыў тагачасны дыякан Андрэй Абламейка, а ўдзел у набажэнстве ўзялі каля дзясятка чалавек.
З лютага 1992 года парафію пачаў акармляць айцец Ян Матусевіч. Ён правёў першае паўнавартаснае набажэнства ў канферэнц-зале Цэнтральнай гарадской бібліятэкі. Доўгі час супольнасць не мела ўласнага будынка, таму набажэнствы праходзілі ў бібліятэцы і ў канцэртнай зале мясцовага музычнага вучылішча.
У канцы 1990-х гадоў парафія набыла ўласны будынак па вуліцы Віленскай. Ён знаходзіўся паміж пуцеправодам і сярэдняй школай № 3. Гэты будынак быў перароблены ў парафіяльную капліцу. У сярэдзіне 2000-х гадоў у капліцу была прывезена ікона Хрыста Чалавекалюбцы (Ісуса Міласэрнага). Доўгі час супольнасць не мела пастаяннага святара на месцы, таму да 2011 года ў Маладзечна рэгулярна прыязджалі святары з Мінска. У 2011 годзе парафія нарэшце атрымала свайго першага пастаяннага настаяцеля.
Пробашчы і святары Спіс пробашчаў і святароў парафіі: люты 1992 — 1998 — айцец Ян Матусевіч (акармляў парафію да сваёй смерці). снежань 1998 — ? — айцец Андрэй Абламейка (выконваў абавязкі адміністратара). пасля айца А. Абламейкі супольнасць таксама акармляў айцец Яўген Усошын. з 30 кастрычніка 2011 года — айцец Алесь (Аляксандр) Шыбека (стаў першым пастаянным пробашчам парафіі).
Крыніцы
Катэгорыя:Парафіі Беларускай грэка-каталіцкай царквы Катэгорыя:Хрысціянства ў Маладзечне Катэгорыя:З’явіліся ў 1991 годзе Катэгорыя:1991 год у Маладзечне