Васкрасенская царква — праваслаўны храм у г.п. Антопаль на вул. Савецкай. Помнік народнага драўлянага дойлідства з рысамі класіцызму.

Гісторыя

Пабудавана ў 1854 г. з дрэва на месцы старой царквы за кошт уладальніка мястэчка памешчыка князя Юльяна Гедройца паводле заказанага ім плана, зацверджанага ў 1852 г. У 1866 г. перад царквой пастаўлена званіца.

Архітэктура Прамавугольная ў плане адназрубная пабудова накрыта двухсхільным дахам з вальмай над алтарнай часткай. Галоўны фасад вылучаны стылізаваным чатырохкалонным порцікам, над франтонам якога ўзвышаецца цыбулепадобны купал на васьмігранным светлавым барабане. Такая ж вежачка (меншага памеру) узведзена над апсіднай часткай. Вертыкальна ашаляваныя сцены рытмічна прарэзаны арачнымі аконнымі праёмамі ў кілепадобных ліштвах і брусамі-сцяжкамі ў прасценках. Пры будаўніцтве храма былі зроблены значныя адхіленні ад праекта — замест двух купалоў пастаўлены адзін на франтальным фасаде, пастаўлены порцік, зменены запраектаваныя памеры.

Перад царквой драўляная двух’ярусная каркасная званіца пад шатровым дахам з макаўкай у завяршэнні. На могілках прыпісная цагляная капліца.

Інтэр’ер Унутры памяшканне расчлянёна чатырма калонамі на тры нефы і мае характар базілікі. Апсіда вылучана драўляным іканастасам 19-20 ст. Над уваходам — кансольныя хоры. Абразы: 17 ст. — «Троіца», 18 ст. — «Троіца новазапаветная», «Маці Божая Замілаванне», «Маці Божая Адзігітрыя», «Маці Божая Адзігітрыя Чанстахоўская», «Спас Пантакратар», «Святы Ілія», «Маці Божая Балезная», «Пакланенне вешчуноў», «Спас з прадстаячымі», «Прарокі», «Святы Сцяфан» (1796), «Свяціцель» (падпісаны «Маловал Е. Есафат Кохановіч дня 22 мая 1791 г.»), канца 19 ст. — «Аляксандр Неўскі», драўляныя скульптуры святых.

Літаратура Праваслаўныя храмы Беларусі / А. М. Кулагін, З. Э. Герасімовіч, У. П. Свентахоўскі. — Мн., БелЭн, 2007.

Спасылкі

Катэгорыя:Драўляныя цэрквы Беларусі Катэгорыя:З’явіліся ў 1854 годзе Катэгорыя:Антопаль (Драгічынскі раён) Катэгорыя:Праваслаўныя храмы Драгічынскага раёна Катэгорыя:Храмы Брэсцкай і Кобрынскай епархіі Катэгорыя:1854 год у Беларусі