Ester Navarrete Santana, nada en Vigo o 16 de marzo de 1990, é unha atleta galega, que compite en maratón. Foi campioa de España de maratón e participou nesta disciplina nos Xogos Olímpicos de 2024. Anteriormente fora sete veces campioa de Galicia en diferentes modalidades (campo a través, 1500 metros, 3000 metros e 5000 metros), e é a actual posuidora dos récords de Galicia de 10 km ruta (32'40''), medio maratón (1h59'58'') e maratón (2h24'40'').
Traxectoria Nada en Vigo, corría en campionatos escolares durante a súa infancia, pero non foi ata á súa chegada á Universidade de Santiago de Compostela cando comezou a competir en atletismo de xeito máis serio. Coa camiseta do Celta de Vigo, iniciouse en probas sub-23 e no 2010 conseguiu os seus primeiros éxitos, proclamándose por primeira vez campioa de Galicia sub-23, na proba de 1500 metros. Ese mesmo ano disputou o Campionato de Europa de campo a través, celebrado na cidade portuguesa de Albufeira. No 2011 gañou catro títulos diferentes de campioa galega sub-23; nas probas de campo a través, 10 km ruta, 1500 metros e 800 metros; e ao ano seguinte revalidou os títulos de campioa de 10 km ruta e 1500 m.
En 2012 proclamouse en Ribeira campioa galega absoluta por primeira vez na súa carreira, nos 10 km ruta, e nos seguintes anos gañou tamén os títulos de 3000 metros (2014), campo a través (2015, 2017 e 2022), 5000 metros (2015 e 2017) e 1500 metros (2022).
Nos Campionatos de España conseguiu subir catro veces ao podio, todas na modalidade de 5000 metros. En 2016 foi terceira por detrás de Trihas Gebre e Zulema Fuentes-Pila, mentres que tanto no 2018 como no 2019 obtivo a medalla de prata por detrás de Maitane Melero. En 2023, dous anos despois de ser nai, regresou ao terceiro caixón do podio, ao rematar atrás só de Marta García e Cristina Ruiz.
En febreiro de 2024 comezou a competir en maratón, e no seu debut en Sevilla proclamouse campioa de España cun tempo de 2h24'40'', conseguindo ademais a clasificación para os Xogos Olímpicos. Xa nos Xogos Olímpicos de 2024, conseguiu rematar a proba na 42ª posición, tras unha carreira con condicións extremas na que chegou a vomitar. En 2026 disputou o Campionato de Europa en Birmingham, onde rematou na 18ª posición, entrando na meta como a terceira das españolas e obtendo a medalla de bronce por equipos.
Palmarés Campo a través Campionato de Galicia (3): 2015, 2017, 2022. Campionato de Galicia sub-23 (1): 2011.
800 m Campionato de Galicia sub-23 ao aire libre (1): 2011.
1500 m Campionato de Galicia (1): 2022. Campionato de Galicia sub-23 (2): 2010, 2011.
3000 m Campionato de Galicia (1): 2014.
5000 m Campionato de Galicia (2): 2015, 2017.
10 km ruta Campionato de Galicia sub-23 (1): 2011.
Maratón Campionato de España (1): 2023.
Notas
Véxase tamén Outros artigos Galegos nos Xogos Olímpicos de 2024
Categoría:Nados en 1990 Categoría:Nados en Vigo Categoría:Atletas de Galicia Categoría:Fondistas