O parque provincial Algonquin é un parque provincial de Ontario situado entre a baía Xeorxiana e o río Ottawa, principalmente dentro da parte do distrito non organizado de Nipissing do Sur. Estabelecido en 1893, é o parque provincial máis antigo do Canadá. Diversas ampliacións desde a súa creación aumentaron o parque ata o seu tamaño actual duns 7 653 km². O parque é contiguo a varios parques provinciais máis pequenos e separados administrativamente que protexen ríos importantes da zona, o que resulta nunha área protexida total máis grande.
O seu tamaño, combinado coa súa proximidade aos principais centros urbanos de Toronto e Ottawa, fai de Algonquin un dos parques provinciais máis populares da provincia e do país. Dentro do parque atópanse máis de 2 400 lagos e 1 200 quilómetros de regatos e ríos. Algúns exemplos notables inclúen o lago Canoe e os ríos Petawawa, Nipissing, Amable du Fond, Madawaska e Tim. Estes formáronse polo retroceso dos glaciares durante a última idade de xeo.
Flora e fauna Dentro dos límites do parque, sábese que viven o seguinte número de especies: 53 especies de mamíferos, 272 especies de aves, 31 especies de réptiles e anfibios, 54 especies de peixes, preto de 7 000 especies de insectos, máis de 1 000 especies de plantas e máis de 1 000 especies de fungos. Entre os animais que habitan o parque destacan os alces, osos negros, cervos virxinianos, gaios do Canadá, castores, raposos comúns, mouchos grises e lobos.
Os bosques de pradairo azucreiro, abeto e bidueiro amarelo son comúns no parque Algonquin. Os investigadores deron con árbores dos bosques primarios de Algonquin de ata 430 anos utilizando o reconto de aneis e ata 610 anos usando técnicas de estimación. Algúns dos bosques primarios do parque Algonquin atópanse na zona de uso recreativo e están dispoñibles para a explotación forestal.
Notas
Véxase tamén
Ligazóns externas Páxina oficial do parque
Categoría:Áreas protexidas do Canadá Categoría:Áreas protexidas establecidas en 1893