Notas de inverno sobre impresións de verán (en ruso Зимние заметки о летних впечатлениях, Zimnie zametki o letnikh vpechlatleniyakh) é un ensaio de Fiodor Dostoievski que recolle as sensacións experimentadas polo seu autor durante a viaxe que realizou durante dous meses e medio no verán de 1862 por varias cidades da Europa central e occidental: Berlín, París, Londres, Xenebra, Florencia, Milán e Viena, entre outras. Historia e características A recompilación de lembranzas, que consta de oito capítulos, foi publicada no número correspondente a febreiro de 1863 da revista Tempo (Vremya), editada en San Petersburgo polo propio Fiodor e o seu irmán Mijail.
A viaxe obedecía, segundo Dostoievski, ao desexo de consultar con médicos especialistas os seus problemas de epilepsia; pero tamén o impulsaba a súa obsesión por probar sorte nas ruletas dos casinos alemáns e o seu afán por coñecer de primeira man as principais capitais europeas pois nunca saíra do seu país.
Trátase dun relato máis sobre as xentes e as formas de vida que sobre os lugares, polos que o autor apenas amosa interese. París e Londres son as cidades que máis chaman a atención do novelista e ás que lles dedica máis páxinas no libro. A súa visión da capital británica é especialmente crítica e pesimista, ataca o arraigado materialismo que alí atopa ademais da pobreza e miseria dos nenos que ve polas rúas, en flagrante contraste co elegantísimo Palacio de Cristal que se erguera un ano antes para a Exposición Internacional.
Notas de inverno sobre impresións de verán ten unha grande importancia no panorama xeral da obra de Dostoievski pois adianta algúns dos temas e ideas das súas futuras grandes novelas e amosa tamén o grande efecto que o contacto coa sociedade occidental causou na súa mentalidade, un contacto que veu a reforzar o seu rexeitamento cara calquera fórmula racionalista que quixera deixar de lado a parte espiritual e relixiosa do ser humano.
Categoría:Obras literarias de 1863 Categoría:Obras literarias en ruso Categoría:Wikipedia:Artigos por validar con WP:TRL Categoría:Obras de Fiódor Dostoievski