Get a Grip é o décimo primeiro álbum de estudio da banda estadounidense de hard rock Aerosmith, editado o 20 de abril de 1993. Foi o seu derradeiro álbum de estudio co selo Geffen Records.
Catro dos seus sinxelos entraron no Top 40 da lista Billboard Hot 100 entre 1993 e 1994: "Livin' on the Edge", "Eat the Rich", "Cryin'", "Amazing" e "Crazy". Os videoclips promocionais das tres últimas cancións axudaron a lanzar as carreiras das actrices Alicia Silverstone e Liv Tyler, filla do vocalista da banda Steven Tyler. A pesar de non ser editado coma sinxelo, o tema "Line Up" apareceu na película de 1994 Ace Ventura: Pet Detective.
En Get a Grip participan músicos coma Don Henley, que canta en "Amazing", e Lenny Kravitz, que colabora facendo coros en "Line Up". Ao igual que nos álbums Permanent Vacation e Pump, moitas das cancións contaron coa colaboración de persoas alleas á banda á hora de ser compostas. Estes músicos son: Desmond Child, Jim Vallance, Mark Hudson, Richie Supa, Taylor Rhodes, Jack Blades e Tommy Shaw.
Get a Grip converteuse no álbum de Aerosmith con mellores vendas en todo o mundo, acadando uns 20 millóns de copias, e trátase do seu terceiro álbum consecutivo en vender máis de 5 millón nos Estados Unidos.
Listaxe de cancións
Categoría:Álbums de Aerosmith Categoría:Álbums musicais de 1993 Categoría:Álbums de Geffen Records