I casoncei o caroncei i è un mangiar tipeg de Bergem e Bressa.

A l'è un tipo de pasta impienida qe a l'è spantegada in tante variants locai, ma con dei ingredients de bas comun a tœte: ol pien a l'è fad su da carna, grana padan gratad e erbe aromatege, con la pasta qe la g'ha una tipega forma a meza luna. Ol tœt conciad con grana padan gratad, bœter, panceta e salvia.

Casoncei a la Bergamasca

Mangiar tipeg de la bergamasca:

Pasta: farina, sal, aigua (variants anca cont ol lait). Pien: pan, parmijan, carna de manz e porcell, pedersem, ugeta, scorza de limon, amarets Forma: a circol piegad, con pasta media-grossa.

Ol pien al conferiss ai Casoncei un lejer savor dolç, carateristega tipega del panorama de la cusina medioeval e rinassimental indova qe i gh'hann orijen; una documentazion certa la ne dis de la so esistenza jamò ind ol 1386. Sota 'l domini venezian ol pien al ciapa denter nœve spezie, amarets e ingredients de orijin de lonj. La riceta de incœ a l'è ol segutar de la version del votcent. Ind la Vall Gandin e ind la volta Vall Seriana i è ciamads Caronséi (patronziad ).

Casoncei de la Bressana

Mangiar tipeg de la Bassa bressana:

Pasta: farina, œv, sal, aigua. Pien: pan, parmijan o grana padan, ai, nox moscada, brœd, pedersem, sal. Forma: de bonbon, barbel, quadrad, triangol.

Tipeg i è i casoncei de Barbariga e Longena, produxids dent ind ol territori comunal de qests do pais de la bassa bressana. Del 2004 i Casoncei de Barbariga e Longena i ha ciapads la De.C.O.

Casoncei de la Vall Camonega

Qei de la Vall Camonega i è considerads la variant plœ "tipega" dei casoncei.

Ogne pais al g'ha un pien divers. I plœ cognossids i è qei:

de Bren, ciamads Caicc ([kaˈitʃ]) de Dò (BS) e Loz (BS), parnonzia locala [kazon'sej] de la bassa vall, parnonzia locala [kaðonˈhej] de la volta vall, ciamads Calzon; pien de pom de terra, formai e carna a Villa Dalegn, erbe e codegin a Pez e de salam, verz, pom de terra a Zoan.

I ricete i cambia po de pais a pais, e ogne fameia la la modifega segond i so variazion.

Riferiments

Vox conrelade Scarpinocc

Olter projet