Barbarossa l’è ü film del regista Rènso Martinèl, che l’è ‘ndacc al cinema in del otörno del 2009, per ès piö precìs a partì dal 9 de Otùer del 2009.
La trama
Barbarossa l’è ü film che l’ pórta sö i schermi ü tòch de la stòria lumbarda, chèla che l’à ést sfidàs ol Imperatùr del Sacro Roman Germànech Impéro Federico I Hohenstaufen ciamàt barbarosa e chèla di cümü lumbàrcc, riunìcc in de la Lega Lumbarda.
Ol Barbarosa l’ pasa i Alp in del 1154 e l’ taca a faga la guera a i cümü de la Al Padana; ol film l’ taca a contà sö la stòria da l’an 1158, quando ü şùen de nòm Albèrt de Giusàn ghe salva la éta a ü caalér che l’è pròpe l’Imperatùr che l’ völ fa sö ün Impéro Universàl che gh’à de rià fina a la Sicilia.
La guèra tra Barbarosa e i cümü lumbàrcc la à ‘nàcc per ü bèl p de agn e ‘n del 1162 l’sömèa che ‘l Barbarosa l’abie venşìt, desà che dòpo ün an de asédio l’à conquistàt, ol 10 de Mars, la sità de Milà, che l fa butà şó töta e l’fà casà vià la sò şét che la é spantegada ‘n di ótre sità lumbarde. Tra i scene piö de efèt del film gh’è pròpe l’asédio de Milà, desà che söl sèt i à fai sö de bèl nöf ü tòch de sità medioeala, con tàt de müra e de tór e pò i l’ l’à asediada del bù e a fórsa de cólp de catapulta i l’ l’à bötada şó töta.
Barbarosa però l’à mia enşìt, i cümü i turna a ribelàs, i se tróa a Puntida, i se giüra fedeltà e i se mèt ‘nsèma in d’öna léga prima ciamada Lega Cremunesa e pò Lega Lumbarda (và precişàt che a l’època di fàcc l’éra ciamada Lumbardéa töta la Al Padana, perciò in de la Lega Lumbarda gh’éra di cümü che al dé de ‘ncö i è ‘n Veneto, ‘n Piemùt, ‘n Emilia). I Milanès i fà sö de bèl nöf la sò sità e dòpo agn de guère se ria a l’öltima bataia, chèla de Legnà: de öna banda l’Imperatùr, de l’ótra i soldàcc di cümü de la Lega strenşìcc intùren al Caròcio. Tra chès-ce la Cumpagnèa de la Mòrt guidada da Albert de Giusà, soldàcc töi vestìcc de nìgher che i a giüràt de mör piötòst che pèrt la bataia e la libertà. La batàia de Legnà la fenès co la vitòria de la Lega e ‘l Barbarosa l’ ghà de ricognòs l’autonomia di cümü lumbàrcc.
Ol cast
In del cast gh’è dét di atùr importàncc e internasiunài, öna particina picinina picinina ghe l’à üda pò l’Umbèrt Bòsi e i è stacc impegnade méler de comparse per i scène di bataie.
I atùr piö ‘mportàncc i è:
Rutger Hauer (Barbarosa) Raz Degan (Albèrt de Giusà) Fred Murray Abraham (Siniscalc Barozi) Hristo Jivkov (Gherardo Negro) Antonio Cupo (Albèrt Dell’Orto) Cécile Cassel (Beatrice de Borgogna) Kasia Smutniak (Eleonora) Angela Molina (Ildegard Von Bingen) Elena Bouryka (Antonia) Hristo Shopov (Rainaldo de Dassel) Federica Martinelli (Tessa) Maurizio Tabani (Giovanni da Giussano) Riccardo Cicogna (Wibaldo) Gian Marco Tavani (Lorenzo della Pigna) Robert Alexander Baer (Albèrt de s-cèt) Zoltan Butuc (Otto da Giusà) Karl Baker (Rainero da Giusà) Vlad Radescu (Mastro Guitelmo) Marius Chivu (Guidone) Stefan Adrian (Ottone) Francesca Ruiz (Eugenie) Alin Olteanu (Enrico il Leù) Stefan Velniciuc (Evandro)
La prima mondiàl
La prima mondiàl la s’è tegnida al castèl isforsèsch de Milà ol 2 de Utùer del 2009 denàcc a tace ospiti del mónd politèch, econòmech e de l’ispetàcol. De fati i éra presèncc prim fra töcc ol Umbèrt Bòsi che l’à ulìt chèsto film e che l’à brigàt per agn per riaga a fal girà, ma ach ol Silvio Berluscù, la Letisia Morati, ol Robèrto Formigù, ol Fabrisio del Nus, la Simona Ventura, ol Salvatore Ligresti, i atùr Rutger Hauer e Raz Degan, ecc, ecc.
Nòte
Ol film l’è costàt sirca 12 miliù de euro e l’è stai giràt per ü bèl tòcc ‘n Romania, sées per spènt de méno, sées per troà di pòscc bèi grancc ‘ndóe püdì girà i scéne di bataie con méla e méla comparse che i gh’èra de püdì möes ‘n libertà.
Ol sito üficiàl
http://www.barbarossailfilm.com/
Ligàm da föra
Trailer
Categoria:Film