La Polizzia Cantonal (Polizia cantonale in italian) a l'è la forza de sigurezza del Canton Tisin. El so comandant a l'è el Matteo Cocchi.
Storia Una prima forza de sigurezza del Canton a l'è fada su in del 1804, ciamada Compagnia de Linia. In del 1814 a l'è trasformada in d'una compagnia scernida, con des stazzion. In del 1855 a l'è fad su el Corp de Giandarmaria e, in del 1900, inn mitud i Delegad de Polizzia. Quater agn dopo a inn mitud i detective e l'è fad su anca el Servizzi Identificazzion e Ricerche.
El lavorà de la giandarmaria, in bas a la lesg, a l'era quell de fà respetà lesg e regolament, controllà forester, cercot, vagabond e sgioeugh d'azard, vardà ogni comun del canton almen 'na voeulta al mes, fà la patulia, soratut de nocc, e vességh semper.
In del 1946 a l'è fada su la polizzia stradal e in del 1952 a l'è doperad per la prima voeulta el nom Polizzia Cantonal. Del 1987 vann in servizzi i prime done. In del 1990 la passa la lesg noeuva de polizzia, che la taca l'organizazzion del dì d'incoeu.
Organizazzion Stat magior
El comandant, nomnad del Consili de Stat, a l'è jutad del Stat Magior, e de la sed central a Belinzona dipenden anca i Servizzi Generai, compagn di resorse umane e di autorizazzion per i armi, per la canapa e per i società de sigurezza privada, e la Central Unega per quei che ciamen.
A gh'è poeu anca un Repart di Intervent Speciai, che 'l se ocupa de menà via la sgent propi pericolosa, de intervegnì denanz ai riat pussee gram, de fàgh la scorta a la sgent important e de fà el servizzi di artificer. La gh'è anca una sezzion coi can e vuna per i lagh.
Giandarmaria A nivell local, a gh'è la Giandarmaria, che la se ocupa, del 1855, de la sigurezza del territori, de solit in divisa, e l'è partida in cinch repart: Mendrisiot Luganes Bellinzones Locarnes Stradal
El repart stradal el lavora in tuta la red stradal del Canton, de norma in divisa, e 'l se ocupa de prevenzion, controll del trafegh, rilev se 'l gh'è un incident gram e anca educazzion e formazzion.
La gh'ha anca una sezzion de suport e de coordenament, che la gh'ha ai so dependenze quater servizzi: la gestion ministrativa, la gestion di presoner, el rimpatri di forester e 'l coordenament di operazzion.
Polizzia giudizziaria La polizzia giudizziaria la lavora, insema a la magistratura, inscì de investigà e catà informazzion e proeuve in sui riat, soratut quei pussee gram, compagn di riat violent, la droga, la violenza sessual e la criminalità organizada, la gh'ha anca di repart bei specializad per indagà in sui cas pussee compless.
A l'è partida in trii repart: Repart giudizziari 1 Riat economegh-finanziari Riat contra el patrimoni Analisi trasce informateghe e criminal operativa Polizzia scentifega Repart giudizziari 2 Commissariad de Ciass Commissariad de Lugan Trata e sfrutament di vesser uman Riat contra l'integrità personal Repart giudizziari 3 Comissariad de Belinzona Comissariad de Locarn Sezzion ricerche e controll Anti-droga
I comissariad gh'hann dent di agent generalista, che indaghen in sui riat pussee normai, compagn di mazzament, di saltament, di rapine, gabole men important, di viture robade e inscì via. I investigator specializad giren borzoad ma armad, vist che gh'hann di compit de sigurezza, menter i analista gh'hann no l'arma.
Assistent e ausiliari
Del 2014 la gh'è la figura di assistent de polizzia (formalment ausiliari de sigurezza publega), che sostegnen l'atività de polizzia in sul controll del trafegh, in sui multe stradai e in su quistion ministrative tant 'me el controll di loterie, di campegg e di obergh, e inn minga armad, perchè i so mester inn de bass ris'c.
Gh'era anca, ma del 2025 inn pu formad, i ausiliari de polizzia, che se ocupaven soratut de postegg e de controll del trafegh stazzionari.
Simboi La marcia In fidelitate securitas a l'è stada componuda in del 2014, per i 210 agn de la sigurezza del Canton, del maester Franco Cesarini, e l'è la marcia ofizzial de la Polizzia Cantonal.
Riferiment Storia Chi assisterà l'assistente?
Alter proget
Ligam de foeura Sit ofizzial
Tisin Categoria:Canton Tesin