Fedarigh II Gonzaga (17 de masg del 1500 – 28 de vost del 1540) l’è stait el prim duca de Mantua. L’ha governad a l’inizzi nomà coma marches a partì del 1519, e pœu coma duca infina a la sò mort. L’è stait ancasì el marches del Monferrad a partì del 1536.
Vita Fedarigh a l’era el s’cet del Franzesch II Gonzaga, marches de Mantua e de la sò mojer Isabella d’Est.Hickson 2016, p. 87. A causa del badaluch politegh del temp, de l’etaa de des agn, l’ha passad trii agn coma ostasg a Roma sota papa Sgiuli II.Murphy 2007, p. 159. Del 1515 al 1517, el Fedarigh l’è stait ostasg del rè Franzesch I de Franza, che el voleva seguràss el socors di Gonzaga in Lombardia.
El 3 de avril del 1519 l’è suzzedud a sò pader coma marches de Mantua,de Pins 2007, p. 267. a l’inizzi sota la resgenza de la mader e di barba Sigismond e Sgiovann. L’ha rezzevud l’investidura imperial de l’imperador Carel V el 7 de avril del 1521. Ind el luj del 1521, papa Leon X l’ha nomenad “Capitan Sgeneral de la Gesa”, e l’ha scombatud contra i Franzes a Parma ind el 1521 e a Piasenza ind el 1522.
El Fedarigh l’ha insegnad sgiò un contrat matrimonial con la Maria Paleologa, ereda del marchesad del Monferrad, cont el fin de gadegnà i sò domini.Fenlon 1980, p. 48. Impunemanca, ind el 1528, papa Clement VII l’ha trait a null el mariozz, in scambi de duu presoner.
El Fedarigh l’ha insegnad sgiò un olter contrat matrimonial con la terza sgermana del Carel V, Sgiulia d’Aragona. Grazzia a questa mossa, gh’è stait conzess el titol de duca ind el 1530, fasend deventà inscì i Gonzaga duca de Mantua.de Pins 2007, p. 268. Tamen, quand che el Bonifazzi, marches del Monferrad, l’è borlad sgiò de cavall el 25 de marz de l’istess ann, el Fedarigh l’ha pagad 50'000 ducad per fà trà a null anca el segond mariozz, cont el ruzà el papa a remeter in vigor el contrat del prim mariozz. Quand che gh’è mort anca la Maria, l’è stait bon de sposà la sorella Margarita el 3 de occiover del 1531. A la mort del darer ered mas’c lesgitem de Cà Paleologa, el marchesad del Monferad l’è passad sota ai Gonzaga, che l’hann tegnud infina al segol XVIII.
Compagn di sò sgent, a l’era un gran patron dei art. L’ha comissionad el Palazz Te, progetad e zornid del Sgiuli Roman.Cockram 2013, p. 58. L’ha ancasì comissionad e crompad deverse picciure del Tizzian, che el gh’haveva anca fait su un litrat, depenc de lu insema al Rafajell.
El Fedarigh el gh’haveva la sifilida, compagn del bobà.Hickson 2016, p. 101. L’è indait al babi el 28 de sgiugn del 1540 a la sò villa a Marmirœul.
Referenze
Font
Ligam de denter Cà Gonzaga Ducad de Mantua
Ligam de fœura
Fedarigh Categoria:Nassud in del 1500 Categoria:Mort in del 1540 Categoria:Nobil lombard