La koinè lombarda medieval (o domà lombard medieval) a l'era ol volgar illuster qe se dovrava ind i tests scrivids ind la Lombardia storega intra i secoi XIII e XV. Ind i fonts medievai l'era ciamada domà lombard o lengua scrivida.
Stude A l'è staita identifegada de l'Adolfo Mussafia ind el so Monument antig dei dialets italian del 1864, ma jamò prima ol Biondelli l'hiva parlad de la possibilitaa de una varietaa siora dovrada a nivell scriit inants qe al rivava ol toscan, e po anc ol Carlo Tenca, ol Carlo Salvioni e 'l Glauco Sanga i l'ha sostegnida.
Storia La koinè la s'è desvilupada a partir del secol XIII ind el ambet de qell qe l'era ol cœr del vegg Regn Lombard, deventad Regn Italeg a l'intern del Sacr Roman Imper. Intra i fator decisiv per la so formazion, de soraplu a la vexinanza dei dialets locai e a la presenza de tante vie de comunicazion, g'è ol costum dei Comun medievai de ciapar aministrador e maester forests, ol jirar dei predicador relijos e dei œvre leterarie, e la sponta unifegatrix dei cort e dei cancellerie. Koinè, Rosario Coluccia, Enciclopedia dell'italiano (2010), Treccani A partir del secol XV la koinè l'ha començad a vesser sostituida del toscan, qe l'hiva ciapad prestij per l'importanza politega de Fiorenza e coi œvre del Dant Aliger, del Francesc Petrarca e del Jovann Bocaç.
Ereditaa In seguet a'l bandonar de la koinè, per scriver i lengue cisalpine i è staite desvilupade ind i secoi dei nœve grafie qe i s'è slontanade del so modell per indar-g dree (de plu o de men a segonda del cas) a la norma toscana. Ind i prim agn del secol XXI, i so cerne grafege i è staite recuperade come bas per la creazion de l'ortografia Scriver Lombard.
Carateristege Intra i trats unifegants de la koinè i è considerads: ol riferiment ai modei leterare latin, provenzal, frances; ol ciapar dei forme comun a tut ol territore; la jeneralizazion dei forme local, o ben ol spantegar dei trats lenguisteg for del territore d'orijen; la progressiva eliminazion dei particolaritaa local.
Autor Secol XIII Bonvexin de la Riva (Milan): poemets; Petro da Barsegapé (Milan): Sermone del 1274; Uguçon da Laodho (Lod): Liber; Gerard Pateg (Cremona): Splanamento; Jacomin da Verona: poemets; Guido Fava (Bologna): Gemma purpurea e Parlamenta et epistole;
Secoi XIV-XV Antonio da Ferrara: Prima che ‘l ferro arossi i bianchi pili; Nicolò de' Rossi (Trevis): Canzoniere; Francesco Vannozzo (Padova): Rime; Anonem (Milan): Loment de Bernabò Vescont.
Riferiments
Bibliografia Sanga, Glauco. La lingua lombarda. Dalla koinè alto-italiana delle Origini alla lingua cortegiana
Categoria:Lenguistega romanza