El Siluan Șpan, al secol Ciprian Nicolae (Gura Râului, 5 de marz 1970) a l'è un vescov ortodoss romen, eparca de la diocesi ortodossa romena d'Italia.
Biografia L'è nassud in Transilvania del Gheorghe, presbiter, e de l'Emilia, dopo el servizzi militar el va a fà i studi teologegh a Sibiu in tra el 1989 'l 1993: l'è donca ordenad diacon el 21 de sginer 1994 e presbiter el 6 de marz inanz.
In tra el 1994 e 'l 1998 el se dotora in teologia a Paris e in de l'istess temp l'è fad confessor del monester de la Protezzion de la Mader de Dio a Yonne, e 'l resta tal fina al 2001.
El 21 de sgiugn 2001 el ricev la tonsura monastega a Lăzești, e 'l ciapa el nom de Siluan, in onor del san Silvan del Mont Athos: el 5 de luj inanz a l'è elesgiud del Sinod Vescov Vicari de la Metropolia Ortodossa Romena de l'Europa Ocidental e Meridional e 'l prim de setember l'è nomnad abad del monester franzes de l'Esaltazzion de la Santa Cros.
L'è ordenad vescov del metropolita Iosif el 21 de otover in la parrochia bordolesa de Sant Isep e l'è mitud in caregh de la cura pastoral di parochie de la Spagna, del Portogall e del Sud de la Franza fina al 2004, quand che 'l manden in Italia insì de otegnì el reconossiment de la local gesa ortodossa romena.
El 5 de marz 2008 l'è elesgiud del Santo Sinod prim vescov de la noeuva Diocesi Ortodossa Romena d'Italia, roeul che 'l gh'ha anca al dì d'incoeu: el s'è mostrad propi atent al tema de l'ecumenism, cont el toeu part a inizziative con la Gesa catolega local e a dàgh interviste a media catolegh tant 'me TV2000.
Riferiment
Categoria:Nassud in del 1970 Categoria:Vescov ortodoss Categoria:Monegh ortodoss Categoria:Ceregh ortodoss romen Categoria:Religios romen