L'Alessandro Minutella (Palermo, 19 de setember 1973) a l'è un pret catolegh italian, scomunegad e desmetud del stat clerical per el so refud de reconosser la validità de l'elezzion del papa Franzesch: dopo quella decision chi l'ha fad su el Sodalizzi sacerdotal marian e 'l Rest pisinin catolegh, che l'ha fad Gran Prelad el 29 de sgiugn 2025.
Biografia Nassud a Palermo, a l'è ordenad sacerdot el 27 de dicember 1999 del vescov Salvatore De Giorgi, a deventà poeu el curad de la gesa de San Giovann Bosch de la capital siciliana, el ciapa poeu la laurea in teologia sistematega a la Pontificia Facoltà Teologega de Sicilia del 2002 e 'l dotorad in Storia del dogma a la Pontificia Università Gregoriana del 2007: el fa su poeu a Carini un centro ciamad Piccola Nazareth dopo che l'ha did de havé parlad con la Vergin Maria, che gh'havaria did che lilinsì la gh'era una font benedeta, azzion che la mena l'arcivescov de Monreale Michele Pennisi a la condana di so atività e a toeugh via i facoltà de scoltà i confession e de fà la predica in la soa diocesi.
Dopo che 'l deventa sostenidor del benevacantism, o ben el penser che el Benedet XVI l'ha minga renonziad in manera valida al so papad e che donca el Franzesch a l'è minga Papa debon, a l'è sospendud a divinis del 2017 e infin scomunegad el 15 de avost del 2018 de l'arcivescov de Palermo Corrado Lorefice, con l'at che ghe riva a november.
A slontanàss de la Gesa catolega el fà su el Sodalizzi Sacerdotal Marian e 'l Rest pisinin catolegh, che per lu a l'è l'unegh vera deposit de la fed catolega quella giusta: l'è redut al stat laical el 18 de november 2021. El gh'ha poeu una longa svesinanza cont el giornalista Andrea Cionci, anca lu sostenidor del benevacantism, s'cepada in l'otover 2024 per via di critehe del Cionci al sodalizzi del Minutella, che per lu l'era fondad in su di profezzie e minga in sul dirit canonegh, e de la scerna del giornalista de sostegnì el recors per via canonega del Giorgio Maria Faré, anca lu scomunegad per havé negad la validità di dimission del Ratzinger, e havéll invitad a dì la Messa in d'una di so conferenze.
El 29 de sgiugn 2025 a l'è, in d'una cerimonia a Monscia, proclamad del Sodalizzi Sacerdotal Marian "Gran Prelad", figura escatologega descrivuda in varie rivelazzion privade, e anca in di test che inn stad poeu ciamad fals de l'Anna Katharina Emmerick, che la gh'havaria el roeul de salvà la Gesa in la fin di temp, e 'l ciapa el titol de "Leon de Maria", cont anca un roeull de facto de Pontefice in del moviment, con la proclamazzion del dogma de Maria co-redentora a Assagh el 8 de dicember adree e la scomunega al Leon XIV per havégh denegad el titol a la mader de Dio.
L'ann inanz Radio Domina Nostra, la webradio del Minutella, l'ha tacad a parlà de lu 'me che se fuss el papa, a ciamà i so viagg "apostolegh" e a scompartì di contegnud indova che se dis che el gh'ha l'ofizzi de san Peder e 'l ciamen Soa Santità. In l'orazzion eucaristega i pret del Sodalizzi el tiren a man, a dì che celebren "in union cont el Leon de Maria".
Liber
Riferiment
Categoria:Nassud in del 1973 Categoria:Ceregh catolegh italian