Smånesle eller eiternesle (Urtica urens) er ein eittårig plante i nesleslekta med «brennande» blad og stengel. Ho er ein av to nesleartar som veks i Noreg; den andre er stornesle.
Planten har motsette, grovtagga blad og lysegrøne blomar som heng i knippe frå bladhjørna. Stengel og blad har brennhår som sprøyter ut ei giftig væske når den skjøre, glasaktige spissen blir broten av.
Smånesle stammar frå Eurasia og er innført i Nord-Amerika og på New Zealand. Ein finn gjerne smånesle i gartneri og kjøkkenhagar.
Smånesle er kjent frå langt tilbake i historia. Fruktene av smånesle er funne i Osebergskipet. Albertus Magnus (1192–1280) oppgav at ho brann sterkare enn stornesle.
Kjelder
Kategori:Nesleslekta Kategori:Viltveksande plantar i Noreg