Feittblad (Liparis loeselii) er ei plante i feittbladslekta Liparis i orkidéfamilien (marihandfamilien) Orchidaceae. Ho er regionalt utdøydd (RE) i Noreg.
Utbreiing Arten var kjend frå nokre få lokalitetar på rikmyrer i låglandet ved Oslofjorden, men vart sist observert i 1936. Ved sidan av attgroing av myrer var uvettig innsamling frå botanikarar ein medverkande årsak til at arten gjekk ut.
Feittblad (svensk namn gulyxne) blir rekna som sårbar (VU) i Sverige.
I Danmark (dansk namn mygblomst) er arten berre kjend frå nokre få spreidde stader og er rekna som sterkt truga (EN).
I Finland (finsk namn kiiltovalkku) er det no truleg berre att ein einaste lokalitet på Åland, og arten er klassifisert som kritisk truga (CR).
Feittblad (engelsk namn fen orchid) veks heilt aust i England og i Wales. Arten er verna gjennom den britiske Handlingsplan for biodiversitet. I den britiske raudlista er arten fra 2025 nedgradert frå sterkt truga til nær truga (NT) på grunn av stabiliserte bestandar. Lokalt er han sterkt truga (EN) i England og kritisk truga (CR) i Wales.
I Estland (estisk namn soohiilakas) veks feittblad spreidde stader over det meste av landet og er rekna som sårbar (VU). I Latvia (latvisk namn lēzela lipare) veks arten ganske spreidd, mest i låglandet ved kysten. Han er klassifisert som sjeldan (kategori 3 – samazinās). I Litauen (litauisk namn dvilapis purvuolis) veks arten no særleg i søraust og i vest. Han er rekna som sårbar (VU).
I Benelux har arten (nederlandsk namn groenknolorchis, fransk namn liparis de Loesel) tidlegare vore funne over store delar av Nederland, men finst no berre i sanddyner ved kysten og i Zeeland. I Flandern i Belgia fanst han før ved kysten, men har no berre ein vekstestad i Kempten. Han kan òg kanskje finnast nord-aust i Vallonia. I den nederlandske raudlista er arten rekna som sterkt truga (EN, bedreigd). I Belgia er han rekna som kritisk truga i Flandern (CR, ernstig bedreigd), og frå 2026 rekna som regionalt utdøydd i Vallonia (RE, éteint). Han finst ikkje i Luxembourg.
I Tyskland er arten (tysk namn Sumpf-Glanzkraut) rekna som strekt truga (EN, stark gefährdet), i Polen (polsk namn lipiennik Loesela) som sårbar (VU, narażony).
Feittblad er ført opp på Bernkonvensjonen si liste over artar som treng særleg vern.
Referansar
Bakgrunnsstoff
Kategori:Orkidear i Noreg Kategori:Orkidear i Sverige Kategori:Orkidear i Danmark Kategori:Orkidear i Finland Kategori:Orkidear i Storbritannia Kategori:Orkidear i Irland Kategori:Orkidear i Estland Kategori:Orkidear i Latvia Kategori:Orkidear i Litauen Kategori:Orkidear i Nederland Kategori:Orkidear i Belgia Kategori:Orkidear i Tyskland Kategori:Orkidear i Polen Kategori:Feittbladslekta