«Long Ago and Far Away» er ein song skriven av James Taylor og først gjeven ut i 1971 på albumet hans Mud Slide Slim and the Blue Horizon. Han var oppfølgjarsingelen til You've Got a Friend og vart ein topp 40-hit i USA og ein topp 20-hit i Canada, og nådde topp 10 på Adult Contemporary i USA. Det er også vorte laga coverversjonar av New York Voices og Johnny Mathis.
Tekst og musikk Taylor skreiv «Long Ago and Far Away» i 1970, omtrent eit år før han vart spelt inn for Mud Slide Slim. Joni Mitchell syng korvokal og Carole King speler piano. Det er ein trist song som Taylor-biografen Timothy White kallar «blant dei mest vemodige i Taylor sin enorme katalog av verdslege salmar». « Temaet i songen er korleis ting ikkje blir som planlagt, korleis drøymer vanlegvis ikkje samsvarer med den endelege røyndommen og korleis forventningar ikkje varer. Teksten skildrar ein ung mann som ikkje har fått draumane sine i oppfylling. Teksten framkallar eit motiv som er vanleg i Taylor sine songar, nemleg havet og det å segla bort av ulike årsaker. Andre bilete i teksten er «ømme draumar» og «knust glas». Mot slutten av songen spør songaren kvifor songen hans er så trist. Uttrykket «long ago and far away» finst aldri i teksten. I staden syng Taylor at «Long ago a young one sits and plays his waiting game». I 1998 noterte Taylor at teksten i det andre verset «Love is just a word I've heard when things are being said» var den «mest samanhengande» delen av songen for han på den tida, og uttalte at «det er ei grubling over naturen til forventningane, og korleis dei ikkje varer».
Kritikaren Al Rudis noterer ein likskap mellom noko av melodien i «Long Ago and Far Away» og den i «Sunny Skies», ein song frå Taylor sitt førre album Sweet Baby James. Journalisten Peggy Mulloy Glad ser det som eit døme på korleis Taylor kan bruka vokalen sin og gitarspelet sitt til å «kommunisera smerta, melankolien og ønska som dei fleste opplever, men få kan uttrykkja.» Musikkforskaren James Perone forklarer at eit av verkemidla til Taylor for å oppnå dette er at «nokre av dei melodiske tonane berører og dveler ved dei øvre forlengingane av akkordane». Han forklarer at dette kan høyrast som milde dissonansar, som kan antyda tungsinn. Dissonansane gir òg songen eit jazz-preg, noko som blir forsterka av Danny Kortchmar sitt conga-spel. Perone påpeikar òg at songen bruker mange akkordar som inkluderer tonar utover den vanlege tretonige treklangen.
Mottaking Musikkjournalisten Dave Thompson skildra songen som «svak.» Men Rudis reknar han som eit «fint drøymande nummer.» Forfattaren Ian Halperin reknar den som den mest dristige songen på Mud Slide Slim. Tretten år etter den første utgjevinga kalla kritikaren Doug Robinson han ei «mindre kjend perle.» Rolling Stone Album Guide-kritikaren Mark Coleman meinte det var den einaste songen på Mud Slide Slim som ikkje var fjollete eller slapp. Cash Box skildra songen som ei «musikalsk perle», og uttalte at den «enkle melodien kling med oppriktigheit og glitrar med den fine produksjonen til Peter Asher. » Taylor sjølv meiner det er «ein sentimental song, men god.»
«Long Ago and Far Away» nådde 31. plassen på Billboard Hot 100 og nådde fjerdeplassen på Billboard-lista Adult Contemporary. Han nådde 12. plassen i Canada, og dessutan niandeplassen den kanadiske Adult Contemporary-lista.
Medverkande James Taylor – solo- og korvokal, akustisk gitar Danny Kortchmar – conga Carole King – piano Leland Sklar – bassgitar Russ Kunkel – trommer Joni Mitchell – korvokal
Andre versjonar «Long Ago and Far Away» vart inkludert på samlealbuma The Best of James Taylor og The Essential James Taylor. Eit konsertopptak opnar albumet James Taylor Live in Rio.
New York Voices spelte inn «Long Ago and Far Away» på albumet Sketches of James: Selection from the James Taylor Songbook. Johnny Mathis spelte inn songen i 1971 på albumet hans You've Got a Friend. Mathis gav òg ut versjonen sin som singel. Billboard Magazine skildra Mathis-versjonen, produsert av Richard Perry, som ein «ballade-skjønnheit» levert «i topp form.»
Kjelder
Denne artikkelen bygger på «Long Ago and Far Away av James Taylor» frå , den 4. april 2023. oppgav desse kjeldene:
Kategori:James Taylor-songar Kategori:Songar skrivne av James Taylor Kategori:Songar frå 1971 Kategori:Singlar frå 1971 Kategori:Songar produserte av Peter Asher Kategori:Warner Records-singlar Kategori:Johnny Mathis-songar Kategori:Metasongar Kategori:Columbia Records-singlar Kategori:Songar produserte av Richard Perry