India Amanda Caroline Hicks () er ein britisk aristokrat, designar og tidlegare modell. Etter å ha gått ut frå New England School of Photography blei Hicks interiørdesignar og verka som modell for mellom anna Ralph Lauren. Ho flytta til Bahamas i 1996, der ho gav ut bøker, promoterte heim- og venleiksprodukt og stod bak ei smykkesamling. Hicks har vitja fleire ulukkesstader i rolla si for Global Empowerment Mission. Frå 2015 har ho drive livsstilsverksemda India Hicks, Inc., som m.a. sel moteklede.
Bakgrunn India Hicks er det yngste barnet og den yngste dottera til Pamela Mountbatten Hicks (fødd 1929) og David Nightingale Hicks (1929–1998). Ho voks opp i Oxfordshire i England. I feriane var ho på slektseigedommen på Irland og på feriehuset deira, utforma av faren, på Bahamas.
Slektskap med kongehuset Hoicks er tippoldebarn av dronning Victoria av Storbritannia, og ho er grandkusine av kong Charles. Mor hennar er syskenbarn av prins Philip, hertug av Edinburgh.
India Hicks er guddottera til kong Charles. Ho var brudejente for lady Diana Spencer då denne gifta seg med prins Charles av Wales i 1981.
India Hicks har ein (teoretisk) arverett til den britiske trona. I arvefølgja er ho plassert etter barna til den eldre systera.
Slekta Mountbatten av Burma India Hicks tilhøyrer Mountbatten av Burma-greina av Huset Battenberg.
Ho er barnebarn (dotterdotter) av krigshelten Louis Mountbatten, 1. jarl Mountbatten av Burma. Han var den siste britiske visekongen av India (februar–august 1947), og var generalguvernør i landet frå august 1947 til juni 1948.
Louis Mountbatten og nokre av familiemedlemmene hans blei drepne av det provisoriske IRA under ein fisketur utanfor Sligo på vestkysten av Irland den 27. august 1979.
Karriere Etter å ha gått ut frå college blei Hicks introdusert av faren for Emilio Pucci i Firenze, der ho blei badetøymodell. Seinare var ho mellom anna modell for Ralph Lauren i New York, Tod's, og J.Crew. Ho budde i Paris i tre år, og var deretter tre år i New York.
Hicks flytta til Bahamas i 1996. Her restaurerte ho hus, investerte i og utvikla eit hotell og gav ut fleire bøker om design og livsstil. Ho starta ein butikk på Bahamas, Sugar Mill Trading Company, i lag med Linda Griffin. Butikken sel smykke, klede, hushaldsvarer og anna.
Frå 2005 til 2014 arbeidde Hicks som talsperson og kreativ konsulent for Crabtree & Evelyn. Selskapet laga produktlinjene India Hicks Island Living og India Hicks Island Night som omfatta såper, lys og parfymar.
I 2008 var Hicks medprogramleiarfor andre sesong av Top Design i Los Angeles i California. Ho innførte si eiga smykkeproduktline i 2011.
Privatliv India Hicks er gift med David Flint Wood. Paret har fem barn.
Bøker 2004: Island Life: Inspirational Interiors 2006: Island Beauty 2015: India Hicks: Island Style 2018: India Hicks: A Slice of England 2020: An Entertaining Story
Kjelder
Denne artikkelen bygger på «India Hicks» frå , og «India Hicks» frå den 6. september 2024.
Kategori:Engelske modellar Kategori:Engelske programleiarar Kategori:Huset Mountbatten