mini|Gunnar Gren til venstre, saman med Gunnar Nordahl og Nils Liedholm, alle i Milan-drakt
Johan Gunnar Gren () var ein svensk fotballspelar, fødd og død i Göteborg. Han vart olympiske meister for Sverige i 1948 og vann VM-sølv i 1958. Gren, som spela indre høgre, deltok i 57 landskampar for Sverige og skåra 32 mål. Klubbspelaren Gren vart seriemeister både i heimlandet og i Italia. Han var aktiv fotballspelar på høgste nivå frå 1938 til 1964.
Karriere Klubbspel Gren debuterte i Allsvenskan 1. mai 1938 for Göteborg-klubben Gårda BK. Fire år seinare melde han overgang til IFK Göteborg, der han i sin fyrste sesong, 1941/42, var med å verte svensk seriemeister. I 1946 vann Gren den aller første «Guldbollen», og året etter vart han skyttarkonge i den svenske fotballserien.
Gren var profesjonell fotballspelar i Italia frå hausten 1949. Han spela fyrst tre sesongar i AC Milan, og deretter to sesongar for AC Fiorentina og til siste ein sesong i Genoa. I Milan danna han saman med landsmennene Gunnar Nordahl og Nils Liedholm den historiske Gre-No-Li-trioen. Han var svært populær i Italia, og det italienske publikumet gav han tilnamnet Il Professore (professoren).
I 1956 flytta Gren heim til Sverige, der han var spelande trenar for Örgryte IS frå Göteborg fram til og med 1959. Seinare trena han GAIS, ein annan fotballklubb i heimbyen. Sin siste kamp i Allsvenskan spela han i 1964, 26 år etter den første. Han var då trenar for GAIS, men sidan det gjekk dårleg for klubben, gjorde han comeback som Allsvenskans eldste spelar nokon gong, i eit forsøk på å redde laget frå nedrykk. GAIS enda på sisteplass og rykte ned.
Landslagsspel Gren debuterte for Sverige i ein landskamp på bortebane mot Finland den 29. august 1940. Han spela på Sveriges landslag som vann gull under OL 1948 i London. Etter å ha fått tilbake amatørstatusen i 1956 spela han landskampar for Sverige til hausten 1958. Ti år etter han vart olympisk meister, spela han indre høgre på det svenske landslaget som nådde finalen i VM 1958 på heimebane. Der vart det 2-5 tap for Brasil.
Merittar Olympisk meister med Sverige i 1948 Sølvmedalje med Sverige under VM i fotball 1958 Svensk seriemeister 1942 med IFK Göteborg Italiensk seriemeister 1951 med AC Milan
Kjelder
Denne artikkelen bygger på «Gunnar Gren» frå , den 17. april 2013.
Kategori:Svenske fotballspelarar Kategori:Svenske fotballtrenarar Kategori:Olympiske meistrar for Sverige Kategori:Medaljevinnarar under sommar-OL 1948 Kategori:Svenske deltakarar under sommar-OL 1948 Kategori:Fotballspelarar under sommar-OL 1948 Kategori:IFK Göteborg-spelarar Kategori:Milan-spelarar Kategori:Fiorentina-spelarar Kategori:Genoa-spelarar Kategori:Spelarar i Fotball-VM 1958 Kategori:Folk frå Göteborg