Axel Desperes, nascut lo 16 de genièr de 2004 a Pau (Pirenèus Atlantics), qu'ei un jogaire francés de rugbi de XV qui jòga au pòste de mièg de dubertura dab la Seccion Paulina.
Biografia
Joentut e formacion Axel Desperes que neixó a Pau lo 16 de genièr de 2004. Que creishó au nòrd deu Bearn, a Garlin dens ua familha d'esportius. La soa mair, Sandrina, qu'excela au basquetbòl, mentre que lo son pair, Cedric, e lo son grand-oncle, Joan-Claudi, que son figuras deu club de rugbi de XV de l'AS Garlin (uei Nòrd Bearn XV).
Axel Desperes que debutè lo rugbi en 2014 a Garlin devath la conducta deu son pair, a l'ententa deus Pòrtas deu Bearn, on jogà dinc aus cadets e's hè remercà per las soas prestacions prometedoras. Seleccionat dens las equipa deu Bearn deus mens de 13 e 14 ans, Axel que guanhè notadament l'Orange Rugby Challenge a Marcoussis en junh 2018. Que guanhè aquera competicion dab Hugo Barracà e Valentin Rambau, futurs coequipièrs deu centre de formacion de la Seccion Paulina.
Axel Desperes que jonhó la Seccion Paloesa en 2018 e que pujà rapidament los escalèrs, dempuish los cadets dinc a l'equipa espèrs, en passant peus nivèus Gaudermen e Crabos. Que's distingí dens la generacion Crabos de 2004, en atenher las miei-finaus deu Campionat de França.
Remarcat com jogaire a potenciau, que n'integrè oficiaument lo Centre de Formacion que pendent la tardor de 2022, après prestacions remercadas pendent lo Supersevens. Dempuish, la soa evolucion qu'ei estada hulguranta : qu'a disputat los sons dus prumèrs matchs professionaus pendent la sason 2022-2023, puish qu'a conegut ua sason 2023-2024 impressionanta dab 25 aparicions e 10 seleccions en Equipa de França de rugbi de XV U20.
Jogaire polivalent, qu'ei capable de jogar aus pòstes de mièg de dubertura, de arrièr o de tresens quarts centre.
En parallèla deu son corredor esportiu prometedor, Axel que persegueix tanben los sons estudis. Titulari d'un bacalaureat scientific (mencion plan), qu'arriba a jongar enter la soa carrièra rugbistica e los sons estudis universitaris en gèni civil a l'IUT de Tarbas.
Carrièra professionau Axel Desperes que participè au Supersevens 2022 dab la Seccion Paulina. Que disputè lo son prumèr match dab l'equipa professionau de la Seccion paloesa lo 13 de genièr de 2023 pendent la tresau jornada de Challenge Cup en remplaçar Thibault Debaes a la 78 minuta pendent un match contra los Dragons. Desperes qu'inscrivó ua penalitat de 40m qui permetó a la Seccion de desgatjar lo bonus defensiu. Que disputè lo son prumèr match en Top 14 com titulari au pòste de mièg de dubertura, lo 28 de genièr seguent au Estadi Mayol. Aqueth dia, contra lo RC Tolon, Desperes qu'inscrivó tres penalitats maugrat la desfaita sus lo marcador de 27 a 16. Tostemps en gèr de 2023, qu'ei convocat dab l'Equipa de França de rugbi de XV U20 per un estagi de preparacion a Capberton en amont deu Torneig de las Seis Nacions deus mens de 20 ans. Qu'ei finalament retengut dens lo grop finau tà disputar la prumèra jornada. Pendent aquera prumèra escadença, qu'entra en dusau periòde contra l'Italia e qu'inscriu ua penalitat importanta a quinze minutas de la fin deu match, los Bleuets que s'impausan finalament 28-27
Referencias
Categoria:Jogaire francés de rugbi de XV Categoria:Naissença a Pau Categoria:Pau Categoria:Bearn