Шрі Ланка ци Срі Ланка (сінг. ශ්රී ලංකා Śrī Laṃkā; там. இலங்கை Ilaṅkai), офіціално Демократична Соціалістична Република Шрі Ланка — острувна держава в южнуй Азії, попри берега Індійського субконтінента. Столиця ся находит у Шрі Джаяварденепура Котте, айбо за майбулшый город и фактічный центер служит Коломбо.
Позад свого ґеоґрафічного положеня и глубокых гаваней Шрі Ланка ся стала важным торговым центром, щи в античні часы познатым у Азії ай Европі. У XVI ст. ся зачинат період політичного домінованя европейськых колоніалных держав: раз портуґальцюв, пак голандійцюв, щи май пак брітанцюв, котрі уд 1817. року контровали вже цілый остров. У 1948. році Брітанськый Цейлон ся став независимым, а теперішню назву прияв у році 1972. У 1983 ся зачала 26-ручна гражданська война, котра ся кончила в 2009 побідов Войська Шрі Ланкы над Тіґрішами ослобоженя тамілського Ілама.
Шрі Ланка є многокултурна и многоетнічна країна. Булшина населеня сут сінгальці, важну історичну роль має тамілська меншина. Змежи иншых ґруп сут потомкы приходникув из Европы и Юго-Восточної Азії (т. зв. «бюрґеры» и «малайці»), мусулмане, китайці и старожителі ведды. Будгізм, котрый практикує дас 70% жителюв, рахує ся за державну реліґію.
Катеґорія:Країны